مجبوريءَ جو نالو مهرباني

�ڪت عزيز کي وزيراعظم ٺاهڻ نيٺ ڇو ضروري آهي؟ مسلم ليگي حضرات چون ٿا تہ جمالي صاحب ۽ صدر صاحب ۾ اختلاف شروع ٿي چڪا هئا. هنن صاحب جي وچ ۾ ڪھڙا اختلاف ٿي سگهن ٿا؟ اڃان تازو ئي مسلم ليگي حڪومت بجيٽ دوران ”سڀ اڇا هئه!“ جي رپورٽ داخل ڪئي هئي ۽ دعويٰ ڪئي هئي تہ جمالي سرڪار وڏيون معاشي ڪاميابيون ۽ استحڪام ماڻيو هو.

جمالي صاحب کي وڌيڪ هڪ بہ پل ڇو نہ رهڻ ڏنو ويو؟ هڪ سياسي آڙيڪاپ ٻڌايو تہ هن وزيراعظم جي حيثيت ۾ پر ڪڍڻ شروع ڪيا هئا..... توهان کي خبر آهي تہ پرن واريون ماڪوڙيون صدر صاحبن کي ۽ خاص ڪري غيباتي سرڪار کي اصل ڪو نہ وڻنديون آهن. فرش جي شيءِ کي فرش تي رهڻ گهرجي، عرش تي اڏامڻ جو حق فقط غيبات جو آهي.آڙيڪاپ ٻڌايو تہ جمالي صاحب کي گمان ٿيڻ لڳو هو تہ هو سچ پچ حڪومت جو مالڪ ۽ وزيراعظم آهي. بس! ان ذهني فتني سبب هن ڪٿي ڪٿي پنھنجي مرضي هلائڻ شروع ڪئي هئي. هن بہ شايد ڪا ”ڊڪٽيشن“ وٺڻ کان انڪار ڪيو هوندو. جيئن ڪنھن وقت ميان نواز شريف چيو هو تہ ”آئون ڊڪٽيشن نہ وٺندس.“ پوءِ سندس ”حال“ منٽن ۾ ”ماضي“ ٿي ويو هو. جمالي صاحب بہ ”ماضيءَ جي ڳالھہ“ ٿي ويو.

جمالي صاحب چوندو رهيو، مون تي استعيفيٰ ڏيڻ لاءِ ڪو دٻاءُ ڪو نہ هو پر اها ڳالھہ پڌري ٿي چڪي آهي تہ شوڪت عزيز جو نالو صدر پرويز مشرف ڏنو هو ۽ مسلم ليگ اها تجويز مقدس تعويذ وانگر چمي اکين تي رکي ڇڏي. اڃا بہ اصرار آهي تہ ڪو زور بار ڪو نہ آهي. حضرت آڙيڪاپ چيو، ”ٻن مهينن لاءِ عبوري تبديلي ان ڪري آندي وئي آهي تہ صدر صاحب کي وردي لاهڻي آهي. ٻہ مهينا انتظار ڪجي ها تہ جمالي صاحب مسئلا وڌائي سگهيو ٿي. ڪي ڪم ورديءَ سان سولا ٿي ويندا آهن. ان ڪري وردي لهڻ کان اڳ مرضيءَ جو مهرو پنھنجي جاءِ تي مقرر ڪرڻ ضروري ٿي پيو هو.“ منھنجو ننڍڙو غير سياسي ذهن وري منجهي بيھي رهيو. ”جنرل صاحب کي تڪڙ ۾ وردي لاهڻ تي ڪير ٿو مجبور ڪري سگهي؟ خدانخواستہ ڪو بندوق اڀي ڪري تہ ڪو نہ بيٺو آهي؟“

آڙيڪاپ وري ڳالهايو، ”آمريڪا جو زور آهي تہ وردي نہ هجي، عالمي راءِ عامه جو مطالبو آهي تہ جمهوريت هجي اهم اداري جو عمل دخل نہ هجي ۽ سياسي عمل اڳتي وڌي.“ خدا بھتر ٿو ڄاڻي تہ آڙيڪاپ کي ايڏو عقل ۽ خبرون ڪٿان سپلاءِ ٿين ٿيون! جيڪڏهن ايئن آهي تہ پوءِ چئي سگهبو تہ پاڪستان ۾ ”بادشاهتي جمهوريت“ سياسي عمل کي پنھنجي قابو ۾ رکڻ ۽ عالمي راءِ عامه جي اکين ۾ ڌوڙ وجهڻ جو عاليشان انتظام ڪيو آهي، ان سان نانگ بہ مري ويندو ۽ لٺ بہ نہ ڀڄندي.

مون کي سياسي حالتن ۽ معاملن تي وڌيڪ سوچڻ نہ گهرجي. مون کي اڄ رات سيوهڻ وڃڻو آهي، سڀاڻي ڀٽ شاھہ ويندس. جمالي، مشرف، چوڌري شجاعت ۽ شوڪت عزيز سان پنھنجو ڪھڙو تعلق؟ دودو ڌوڙ، چنيسر ڇائي!