ابڙو اڪيڊمي Abro Academy
2020-11-05
داخلا نمبر 1014
عنوان مقدس رشتا ته بارود ۾ نه ٻاريو!
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1125
داخلا جو حوالو:
هن داخلا جون تصويرون نه مليون
مقدس رشتا ته بارود ۾ نه ٻاريو!
سنڌ جي قلمڪارن هميشه ان لاڙي جي خلاف مزاحمت ڪئي آهي ته سياسي تحريڪن ۾ ٻارڙن کي استعمال ڪجي. سياستدان ان مزاحمت تي چڙيا به هئا پر ڪنهن جي چڙڻ تي هٿيار ڦٽا ڪو نه ڪيا. ايم ڪيو ايم به ڪراچيءَ ۾ ساڳين پيرن تي هلي رهي آهي. فسادن وارن ڏينهن ۾ اسڪولن جا ٻار روڊن تي پٿراءُ ڪن ٿا ۽ باهيون ڏين ٿا. ڪهڙي خبر ته انهن کي هٿن ۾ ڪريڪر ۽ هينڊ گرنيڊ به ڏنا ويندا هجن!
تخريبي ڪاررواين ۾ معاشري جي ڪمزور ۽ معصوم انسانن کي جنون، ڪوڙ ۽ بليڪ ميلنگ ذريعي استعمال ڪرڻ جو لاڙو آخري حد تائين وڃي پهتو آهي. ايم ڪيو ايم پنهنجين صفن ۾ موجود دهشتگردن کي بچائڻ لاءِ عورتن جي اوٽ وٺڻ جي حڪمت عملي ته گهڻو اڳ اختيار ڪئي هئي پر ڪجهه عرصي کان اها به خبر پئي آهي ته دهشتگرديءَ جي ڪاررواين ۾ ان طبقي جون ڪجهه عورتون به سڌيءَ طرح ملوث آهن. باهه سان راند ڪبي ته ڪنهن ڏينهن باهه به پنهنجو وارو وٺندي. سرڪاري ايجنسين ڪجهه وقت اڳ ٽيليويزن تي صحافين آڏو آڊيو ڪيسٽون وڄائي ٻڌايون هيون، جن ۾ ڪي عورتون دهشتگرديءَ جي عمل ۾ ساٿاري نظر اچي رهيون هيون.
هاڻي، نصير الله بابر جو هڪ بيان ته ”حڪومت هاڻي باجين جي خلاف به ڪارروائي ڪندي“ ايم ڪيو ايم لاءِ واويلا جو اهم نڪتو بڻجي رهيو آهي. هوڏانهن اهي به اطلاع اهن ته هڪ اين جي او جون ميمبر خواتين اڄڪلهه جڏهن ڪراچيءَ جي ٻهراڙين ۾ فلاحي ڪمن لاءِ انگ اکر جمع ڪري رهيون آهن ته هو پنهنجي ليکي اهي اضافي سوال خاص طور تي پڇي رهيون اهن ته سندس مرد ڪيترا آهن؟ ڇا ڪندا آهن؟ ڪهڙو وقت گهرن کان ٻاهر رهندا آهن؟ ڇا وٽن ڪا بندوق آهي ۽ ڇا اها اهو هلائي به سگهندا آهن؟ ظاهر اهي ته فلاحي ڪم جو بندوق جي موجودگيءَ بابت سوال سان ڪو به تعلق نه آهي. هي سڌيءَ طرح سان ڪن ٻين مقصدن لاءِ معلومات جمع ڪرڻ جو سلسلو آهي
ايم ڪيو ايم جو قيادت جڏهن عورتن کي دهشتگردي ۽ جاسوسيءَ جي ڪمن تي لڳايو آهي ته پوءِ کين اها شڪايت به نه هئڻ گهرجي ته هاڻي حڪومت عورتن خلاف اڳرائي ڪندي. عورت جو تقدس پائمال ته اهي اڳ ئي ڪري چڪا، جن عورتن کي سياسي بارود ۾ ٻارڻ شروع ڪيو ۽ موت جي ڪاروبار ۾ ڇڪي ورتو. تنظيم جي اندروني حلقن ۾ اهي خواتين ”باجيون“ آهن، خدا ڄاڻي ته سندس تنظيم نرم دل عورتن کي ڪهڙي طرح دهشتگردي جي بي رحم ڌٻڻ ۾ هلڻ تي مجبور ڪري ورتو آهي. خدا ڄاڻي ته ڪنهن ڪنهن عورت کي بليڪ ميل ڪيو ويو آهي ۽ هاڻي جڏهن قانون نافذ ڪندڙ ادارا مجبور ٿي دهشتگردن جي ان ڍال کي هٽائڻ لاءِ اڳتي وڌڻ چاهين ٿا ته سياسي واويلا ڪئي ٿي وڃي ته ”مهاجرن عورتن جي بي عزتي ٿيڻ واري اهي يا ٿي رهي آهي.“
عورتن ۽ ٻارڙن کي سياست ۾ حڪومت ته ڪو نه لاٿو آهي جو ان کان مطالبو ڪجي ته ههڙو ظلم نه ڪيو ۽ عورتن ۽ ٻارن کي سياسي کوري ۾ نه اڇلايو، سندن ڪچڙا ذهن ۽ نفيس جذبا بيدرديءَ سان نه ڪهو! اها دانهن جن جي آڏو ڪرڻي آهي، انهن جون دليون ته ائي پٿر ٿي چڪيون آهن ۽ انهن جي اکين مان انسان نه، بگهيڙ ليئا پائي رهيا آهن. ان ڪري هاڻي جڏهن هن وحشي تنظيم نت نون طريقن سان سنڌي گهرن جي سروي جو ڪم شروع ڪيو آهي ته سنڌي ڪٽنبن کي محتاط رهڻ جي ضرورت آهي.