ملاحن جو ميڙو - ابراهيم شاھہ واڙيءَ وارو

ملاحن جو ميڙو - ابراهيم شاھہ واڙيءَ وارو

سنڌ جي ڊيلٽا ۾ اوڀر طرف سير ڪريڪ ويجهو هڪ ٻيٽاريءَ تي هر سال هڪ عظيم ميلو لڳندو آهي. هن ٻيٽ تي جنھن بزرگ جي مزار آهي تنھن کي ”ابراهيم شاھہ واڙيءَ وارو“ جي نالي سان شهرت حاصل آهي. هن ميڙي ۾ سنڌ، ڪڇ ۽ بلوچستان جي سامونڊي ڪنڌين ۽ کارين تي رهندڙ سڀ ملاح لازمي طور شريڪ ٿيندا آهن. هيءُ سامونڊي ملاحن جو وڏي ۾ وڏو ميلو آهي جيڪو گهٽ ۾ گهٽ ڏھہ ڏينھن جاري رهندو آهي. هن موقعي تي هڙهن جا مالڪ پنھنجن پنھنجن پتڻن ۽ بندرگاهن تان ٻيڙا ڪاهي ابراهيم شاھہ واڙيءَ واري جي سلامي ڀرڻ ويندا آهن. ٻيڙا رنگا رنگي جهنڊن ۽ جهنڊين سان سينگاريا ويندا آهن ۽ عورتون، ٻار، جوان ۽ پوڙها دهلن دمامن سان ٻيڙن تي سوار ٿيندا آهن. ڪي باسون باسڻ لاءِ نڪرندا تہ ڪي مرادون پوريون ٿين جي خوشيءَ ۾ چادرون کڻي هلندا. هي ميلو هر سال مارچ اپريل ڌاري لڳندو آهي.

ملاحن جو عقيدو آهي تہ جيڪو ملاح هن ميلي ۾ شريڪ نہ ٿيندو ۽ ”بادشاھہ“ ابراهيم شاھہ جي حاضري نہ ڀريندو. سو ايندڙ سال مڇيءَ جي شڪار کان محروم ٿي ويندو. بيماريون ڏسندو يا جوکم ۾ پوندو. مون جڏهن ابراهيم شاھہ واڙيءَ واري تي لنگرانداز ٻيڙن جي تصوير ڇڪي، ان وقت اهي خشڪيءَ تي بيٺا هئا. سامونڊي وير لٿل هئي، پر هر ٻارنھن ڪلاڪن کانپوءِ جڏهن وير چڙهندي آهي تڏهن اهي ٻيڙا وري سير تي سفر لاءِ تيار هوندا آهن.

سنڌو ڊيلٽا ۾ ويرن جي لاھہ ۽ چاڙھہ جو اهڙو ئي موقعو هو جڏهن سڪندر اعظم جا ٻيڙا اوچتو ڦاسي پيا هئا. دنيا جو وڏو فاتح هڪ وڏي گپ ۾ منجهي بيھي رهيو ۽ نيٺ سنڌي ملاحن جي مدد سان ٻيڙا هڪاري سگهيو هو. جيڪڏهن توهان هن ميڙي جو مشاهدو ڪرڻ چاهيو تہ ڪراچيءَ جي ڪنھن بہ بندرگاھہ، ابراهيم حيدري، لٽ بستي، ڪيٽي بندر، کارو ڇاڻ، جنگي سر، ڳاڙهو يا شاهبندر وٽان ڪنھن بہ هڙهي تي چڙهي سگهو ٿا. ٻيڙياتا پنھنجي روايت موجب توهان کان ڀاڙو نہ وٺندا ڇاڪاڻ تہ توهان پير ابراهيم شاھہ جي سلامي تي وڃي رهيا هوندا. ياد رکجو تہ هن سفر ۾ اوٽ موٽ توهان کي گهٽ ۾ گهٽ ٻہ يا ٽي ڏينھن لڳي ويندا.