ملير ۾ دهشتگردي

ملير ۾ دهشتگردي

نئون سال شروع ٿيڻ سان ئي ڪراچي جي سنڌي آبادين تي ايم ڪيو ايم حقيقي وارن جا حملا نوٽ ڪيا ويا اهن جيڪي اڄ تائين جاري آهن. انهن خوني حملن ۾ گذريل هفتي ڏهن ڏينهن کان ڪجهه تيزي نظر پئي اچي. هن وقت تائين سنڌي آباديءَ جا ٽي چار ماڻهو مري چڪا آهن. اهو سلسلو نئين سال جي شروعات سان ان مهل کان شروع ٿيو آهي جڏهن ”حقيقي“ گروپ پيپلز پارٽيءَ جي اڳواڻ هسين ٻڍا جي گهر تي فائرنگ ڪئي. ان فائرنگ جي دفاعي موٽ ڏني وئي ته پوءِ ملير ۽ کوکرا پار ۾ ”گهرو لڙائي“ جو ٽريلر هلي پيو.

هاڻي کوکرا پار ملير جون گهٽيون، جيڪي سنڌين ۽ ”مهاجرن“ جي گڏيل سڏيل آباديءَ تي مشتمل آهن، ٻنهي ڌرين جي حفاظتي مورچن سان ”محفوظ“ ڪيون ويون آهن. ڪراچيءَ جي صورتحال ۾ هيءَ نئون مرحلو آهي جيڪو ”ڌربنديءَ“ کانپوءِ ”مورچيبندي“ جي حد تائين پهتو آهي. شهر ته اڳ ئي سنڌي ”مهاجر“، بنگالي، پٺاڻ ۽ ٻين ٽڪرن ۾ ورهائجي ويو هو، هاڻي گهٽيون به ورهائجي رهيون آهن. شهر جون ڪالونيون نسلي ۽ لساني بنيادن تي ورهائجن ته اها وري به هڪ ڳالهه آهي پر جڏهن گهٽيون ورهائجڻ لڳن تڏهن بالڪل ٻي صورتحال آهي. رهائشي ڪالونيون ويڙهاڪ ڌرين جون ڇانيوڻيون بڻجي وڃن، آهي ته اها به بي حد خطرناڪ صورتحال پر جڏهن گڏيل آبادين ۾ گهٽيءَ گهٽيءَ جي منهن تي مورچو قائم ٿئي ته اها صورت اڃا ب خطرناڪ آهي ۽ ان جي معنيٰ اها آهي ته ”ڪراس فائرنگ“ شروع ٿي چڪي آهي.

اهڙي صورتحال جو نوٽيس حڪومت ضرور وٺندي آهي ۽ ورتو به ويو آهي پر ڏاڍي عجيب طرح سان. ٻڌڻ ۾ آيو آهي ته ان علائقي مان جيڪي به گرفتاريون ڪيون ويون آهن، اهي ”توازن“ ڏيکارڻ لاءِ انهن سنڌي ڪڇي ماڻهن جون ٿيون آهن جن جا مٽ مائٽ ” حقيقي“ دهشتگردن هٿان مارجي ويا آهن. حيرت آهي ته دهشتگرد مداريءَ جي ڀولن وانگر بندوقون ۽ ٽي ٽي پستول کنيو ٺڪا ٺوڪي ڪرڻ لاءِ آزاد پيا ڦرن ۽ مقتولن جا مائٽ گرفتار ڪيا وڃن ٿا. قانون نافذ ڪندڙن سنڌي آبادي جو گهيراءُ ڪري هٿيار ڪڍڻ جي ڪوشش ڪئي پر اتان ڇا نڪتو؟ جن ڌرين وٽ هٿيار آهن، انهن وٽان ئي هٿيار نٿا نڪرن ته انهن وٽان ڇا نڪرندو جن وٽ بچاءُ لاءِ پراڻي زمان جون ڍالون به ڪو نه آهن!؟

ڪراچي جا قديم لوڪ دفاعي صورتحال ۾ آهن ۽ حڪومت ڄاڻي ٿي ته ايم ڪيو ايم جا دهشتگرد ڪهڙا ارادا رکن ٿا ۽ هن مهل تائين ڪيترن سنڌين کي چونڊي چونڊي قتل ڪري چڪا آهن. انهن جي ابتڙ سنڌي لوڪ پر امن رهيا آهن ۽ دهشتگردن کي في الحال ڪو به اڳرو ۽ اڳرائي وارو جواب نه ڏنو اٿائون، سواءِ ان جي ته هاڻ هو اهو سوچي رهيا آهن ته پنهنجي زندگي بچائڻ جو فطري حق استعمال ڪرڻ لاءِ هنن کي ڇا ڪرڻ گهرجي، خاص ڪري ان وقت جڏهن حفاظتي ادارا ٽارگيٽ ٿيل مقامي آباديءَ جي حفاظت ۾ غير موثر، لاتعلق يا ناڪام ويا آهن. اهڙن موقعن تي حڪومت کي ڪرڻ تي ايئن گهرجي ته قانون جي دائري ۾ رهي مقامي آبادين کي دفاعي تدبيرون وٺڻ ۾ مدد ڪري. پر هتي قصو ئي ابتو لڳو پيو آهي جو مقتولن جي مائٽن کي گرفتار ڪيو وڃي ٿو ۽ قاتل ٽپندا ڪڏندا ٿا وتن!

ڪراچيءَ ۾ سنڌين جي خراب صورتحال تي ڪنهن سنڌي اخبار جي خبر ۽ نشاندهي شايد اعتماد جوڳي شاهدي نه سمجهي وڃي، هتي هڪ هٿ ٺوڪي قومي اخبار جو حوالو پيش ڪجي ٿو جنهن لکيو آهي ته ”ڪراچي ڪيئي شهرن ۾ ورهائجي وئي آهي ۽ بدامنيءَ سبب ڳتيل آبادي وارا علائقا متاثر آهن.“ اخبار جي خبر موجب ”ڪريڪ ڊائون ۽ دهشتگرديءَ جي لهر جيڪا اڳ سينٽرل ۽ ويسٽ جي علائقن ۾ (ايم ڪيو ايم الطاف گروپ جي اثر وارن علائقن) ۾ هئي، هاڻي اوڀر ۽ ڏکڻ ضلعن ڏانهن وڌي رهي آهي.“ اها ئي رپورٽ چوي ٿي، ”ڪراچي جي 75 سيڪڙو علائقي ۾ ملڪيتن جا اگهه ڪري پيا آهن.“ اوڀر ۽ ڏکڻ وارا علائقا شروع کان ئي ايم ڪيو ايم جي اثر کان آجا رهيا آهن پر هاڻي جڏهن اتي ايم ڪيو ايم حقيقي سرگرم ٿي ٿي آهي ته ملير ۽ اوڀر ضلعي جون ”غير مهاجر“ آباديون سڌيءَ طرح بندوقن ۽ گولين جي منهن ۾ اچي ويون آهن.

ڪراچيءَ ۾ هلندڙ ويڙهه ۾ ايم ڪيو ايم حقيقي جو ڪردار واقعي اهم آهي ۽ ان جا ويڙهاڪ جٿا جيڪي نوجوان ڇوڪرين ۽ ڇوڪرن تي مشتمل آهن، ڏاڍو پراسرار ۽ خوفناڪ ڪردار ادا ڪري رهيا آهن. خود ايم ڪيو ايم الطاف گروپ جنهن جو ڪردار حقيقي کان به خطرناڪ آهي، ”حقيقي“ کان ڊنل ۽ ٽڪراءَ ۾ آهي ۽ اهو به الزام مڙهي ٿو ته خفيه هٿ ان جي سرپرستي ڪري رهيا آهن. ڪراچيءَ ۾ سنڌي آبادي سان ”حقيقي“ جي سڌي ويڙهه ۽ لشڪر ڪشي هڪ پاسي ايم ڪيو ايم الطاف جي دعوا کي هٿي ڏئي ٿي ته ٻئي پاسي سنڌي آباديون اهو سوچڻ تي مجبور ٿي رهيون آهن ته آخر اهي ”خفيه هٿ“ ڇا ٿا چاهين؟