منگو فقير جتوئيءَ جو مقبرو

منگو فقير جتوئيءَ جو مقبرو
ميان جي مقبري جي ڏکڻ ۾ هڪ اوچو مقبو منگو فقير جو ٻڌايو وڃي ٿو، جيڪو روايتن موجب ميان يار محمد جي مکيه سالارن مان هڪ هو، ۽ چون ٿا ته هُو ميان جي ديري لاءِ کير پهچائڻ جو ذميوار هو. هن جو مقبرو سِرن جو ٺهيل آهي، جنهن تي سفيد پلستر ڪيو ويو هو. هن وقت عمارت جي هيٺئين حصو جو پلستر لهي ويو آهي، البت مٿي گنبذ جي هُرين دار ڳچيءَ تي پلستر باقي آهي. سادو محرابي دروازو اوڀر کان اٿس، ديوار جي ٿولهه لڳ ڀڳ هڪ ميٽر آهي. چوڪنڊي عمارت کي زمين جي سطح کان ئي ڪنڊن وٽان ونگدار ڪلها ڏيئي اٺڪنڊي ۾ بدلايو ويو آهي. ان طرح ڪنڊ تي پنج ميٽر اڀيون هُريون ٺهي پيون آهن. اتر واري ڪنڊ ويجهو اولهه واري دروازي ۾ مٿي چڙهڻ لاءِ ڏاڪڻ ٺاهي وئي هئي. گنبذ جي اوچي ڳچي ٻاهران به اٺ ڪنڊي آهي ۽ ان جي هرهڪ پاسي کان ٽي ٽي پئنل آهن، هر پاسي کان وچون پئنل هُريدار آهي.
مقبري ۾ ٻه قبرون آهن، جن مان اولهه واري قبر گنبذ جي هيٺان آهي. گهڻو ڪري اها ئي قبر منگو فقير جي آهي. ٻي قبر بعد جي آهي ۽ چئي نٿو سگجي ته اها ڪنهن جي آهي؟