مول شريف ۾ دريا شاھه درٻار

مول شريف ۾ دريا شاھه درٻار

گڏاپ مان ’ پُوڄا ماتا‛ جي خاص اجازت سان اسان مول شريف روانا ٿياسون. ھي ھندن جو واحد ماڳ آھي جنھن سان لفظ’ شريف‘ به شامل ڪيو وڃي ٿو، جيئن : روھڙي شريف، سيوھڻ شريف وغيره . اھو شايد انڪري ته ڏور ٻھراڙيءَ جي ھن علائقي ۾ شھرن جھڙو ڪو ڀيد ڀاؤ نه آھي. ۽ جيئن ته مول ۾ قائم ھي مندر درياھه پير جو آھي، انڪري اھو ھندن وٽ اُڏيرو لال ۽ مسمانن لاءِ خواجه خضر آھي.

مول ٿاڻي بُولا خان تعلقي جي انتھائي اولھه وارين حدن ۾ ۽ ڪراچيءَ جي اُتر وارين حدن کي ويجھو آھي ۽ هن علائقي ۾ گڏاپ (ڪراچيءَ ۾ شامل) کان پوءِ ٻي اھم آبادي آھي. نئه مول ھتان ئي ڀَر پاسي کان شروع ٿئي ٿي.

ھندن وٽ مول مندر جي خاص اھميت آھي. اٽڪل ڏھن ايڪڙن تي ٻڌل چؤديواريءَ ۾ ھي آشرم اسٿان آھي. اسان پُوڄا ماتا جي چِٺي مندر وارن کي ڏني، جن ڏاڍي پاٻوھه سان ڀليڪار ڪئي. ھن ڪمپليڪس جي وچ ۾ ھڪ رنگارنگي گنبذي اڏاوت بيٺل ھئي. گنبذ جي ھيٺان وڏو کوھه کوٽيل ھو. ”ھي جھولي لال جو کُوھه آھي!‟ ھڪ شيواڌاريءَ چيو، ”ھن ھنڌ پوڄا ماتا جوڳ پچائيندي آھي!‟ پوڄا ماتا جي حيثيت ھنن درياھه پنٿين وٽ زندھه پير جھڙي ھئي. مول مندر کي عام طور دريا شاھه درٻار چوندا آھن. گنبذي اڏاوت کان ٻاھر ھڪ ديوار تي درياھه پِير جي مورتي چِٽيل ھئي جيڪو پلي تي سوار آھي. مندر جي ھڪ ننڍڙي ڪمري ۾ جُھولي لال جي ست مڻ وزني سنگ مرمري مورتي رکيل آھي. اھا ھندستان مان گھڙائي وئي آھي. فنڪار پنهنجو پورو فن ڏيکاريو آهي. هيءَ خوبصورت مورتي ايئن آهي ڄڻ ته ڪو ڏَيا وارو درويش جوڳ پچائي رھيو ھجي. شيوا ڌارين اسان کي ان مورتيءَ جي تصوير ڇڪڻ کان منع ڪيو. دريا شاھه درٻار ۾ ھندن جي نئين سال جي چيٽي چنڊ جي موقعي تي ميلو لڳندو آھي.