ابڙو اڪيڊمي Abro Academy
2020-11-04
داخلا نمبر 939
عنوان ميان جو ڪوٽ:
شاخ منڇر گورک گاج دنيا
پڙهيو ويو 1194
داخلا جو حوالو:
هن داخلا جون تصويرون نه مليون
ميان جو ڪوٽ:
” ... ۽ هيءُ ميان جو ڪوٽ آهي! پر جيڪڏهن توهان اتي لهندؤ ته ڪاري ڪوٽ تائين پهچي نه سگهندؤ!“ جمن چتاءُ ڏنو.
مون اٺ تان ويٺي ويٺي ’ميان جي ڪوٽ‘ جون تصويرون ورتيون. اها نئه جي ساڄي ڪپ تي تقريباََ ٽن جريبن تي پکڙيل پٿرن جي اوساري هئي. ديوارون ڪافي ڊهي چڪيون هيون، ان هوندي به سڄو نقشو موجود هو. چئن ڪنڊن تي چار ويڳاڻا برج ڪمزور ديوارن سان پاڻ کي سنڀالڻ جي ڪوشش ڪري رهيا هئا. سرڪاري نقشن ۾ هن علائقي ۾ ٻن قلعن جي موجودگي ظاهر آهي ۽ ٻنهي کي ڪارو ڪوٽ لکيو ويو آهي. پر مقامي ماڻهن نئه جي ساڄي ڪپ تي موجود هن ڪوٽ کي ’ميان جو ڪوٽ‘ (ڪلهوڙن سان منسوب) ٿي سڏيو ۽ نئه جي کاٻي ڪپ تي هڪ ڪلو ميٽر پري اولهه ڏکڻ ۾ هڪ ڪاري ٽڪريءَ جي چوٽيءَ تي واقع کنڊرن کي ’ڪارو ڪوٽ‘ ٿي چيائون. ميان جي ڪوٽ جي ديوار جي ويڪر لڳ ڀڳ ٽي فٽ ۽ باقي موجود اوچائي چار پنج فٽ ٿي ڏٺي. هر ڪنڊ تي بيٺل مورچا ست اٺ فٽ ڊيگهه ويڪر جا هئا. هي ڪوٽ ميان نصير ڪلهوڙي وڏيري جلال ابڙي جي مشوري تي ٺهرايو هو. تاريخ ڪلهوڙا جلد اول (صفحو 154) تي ”مرآت“ جي حوالي سان لکيل آهي ته ”ميان نصير محمد وڏيري جلال خان مرحوم جي صلاح سان نليءَ (نئه نريءَ) ۾ قلعو ٺهرايو هو ۽ چهني (ڇني) پرڳڻي تي پنهنجو قبضو ڄمايو، پوءِ هن ڪيترن ئي ماڻهن کي پاڻ وٽ گڏ ڪري شورش برپا ڪئي.“