0000-00-00
داخلا نمبر 1425
عنوان مَـھـيـر جـبـلـن ۾ وڏن پـٿـرن جـو ڏسُ
شاخ ڪراچي ڪوھستان
پڙهيو ويو 10781
داخلا جو حوالو:
هن داخلا جون تصويرون نه مليون
مَـھـيـر جـبـلـن ۾ وڏن پـٿـرن جـو ڏسُ
88 – 1987 ڌاري گل حسن ڪلمتيءَ ٻڌايو ھو ته موئيدان واري پاسي ڪنھن ھنڌ کان گذرندي ھن ڪي تمام وڏا ۽ گھڙيل پٿر ڏٺا ھئا ... اھو ڏس ڏيڻ کان پوءِ ھُو ھميشه وانگر گم ٿي ويو ھو. ڪافي سال لنوائڻ کان پوءِ جڏھن ھُو وري ظاھر ٿيو، مون زوردار اپيل ڪئي ھئي.
”جيڪي آھن، اتي ئي ھوندا ... ھاڻي مون کان لڀجن نه ٿا.‟ گل حسن ڪلمتيءَ گھڻا ڀيرا فرمائش کان پوءِ اھو جواب ڏنو. ھونئن ته پاڻ به وڏو رولاڪ آھي ۽ علائقو به ھن جو پنھنجو آھي، ڀلا ھن کان اھي گس گم ڪيئن ٿيا؟
سالن کان پوءِ چيائين، ”ھاڻي مون ٻيھر ڏٺا آھن، پروگرام ٺاھه ته ھلي ڏسي اچون!‟ مون انور بلوچ کي جيپ لاءِ چيو. انور اھڙن ڪمن ۾ مون کي ڪڏھن به انڪار نه ڪيو آھي. سچ پچ ته ھو پاڻ دعوت ڏيندو رھندو آھي ته اھڙن ڪمن لاءِ سنگت مٿس بار رکي !
”تون ھاڻي ئي ھليو اچ، گاڏي بيٺي آھي، ان ئي ڪم لاءِ ته آھي ! انور پيرزادي کي به چئو، ٻيو به ڪو دوست ھجي ته اڃا به سٺو ... رات جو ڪچھري ڪنداسون، صبح جو توھان گل حسن سان وڃي گھمي ڦِري اَچجو!‟ انور بلوچ بنا ڪنھن سوال جواب جي دعوت ڏني.