ابڙو اڪيڊمي Abro Academy
2020-11-04
داخلا نمبر 942
عنوان نئه نري ۽ اُونڌ
شاخ منڇر گورک گاج دنيا
پڙهيو ويو 1245
داخلا جو حوالو:
هن داخلا جون تصويرون نه مليون
نئه نري ۽ اُونڌ
”نئه نري ڪٿان شروع ٿئي ٿي؟“ مون حاجي عرس وٽان معلومات جمع ڪرڻ شروع ڪئي.
”لَوپ (گُرو جبل) کان، لَوپ معنيٰ لَپ، اتان پاڻي گڏ ٿي نريءَ ۾ پوندو آهي.“
”اتي ٻيا ڪهڙا لَڪ آهن؟“
”روهيل لَڪ لَوپ کان اتر ۾ آهي، روهيل کان اتر ۾ ڦوسي لڪ ۽ ان کان به اتر ۾ عباس لَڪ آهي.“
”لَوپ وٽ ڪهڙو لَڪ سڏبو؟“
”لنگهه!“
”گَرو ۽ گُرو جدا جدا جبل آهن يا ساڳيو آهي؟“
”جدا جدا آهن!“
”ان کي گُرو جبل ڇو ٿا چون؟“
”اتي قديمي گهرن جا نشان آهن، اتي علي سائين آيل آهي ... اتي هڪ گُرو رهندو هو. جڏهن ان گُروءَ ڏٺو ته علي سائين پيو اچي، ته هن ٽٻي هنئي. علي سائينءَ نيزو هنيس ته غار ٺهي پئي. ٽي غارون ٺهيون، اتان آبشار ڦُٽي پيا. ان غار ۾ لائٽ نه ٿي ٻري. گدوءَ واري ’ڳاڙهي ڪڇي‘ ۾ آهي ۽ اهو پاڻي نئه انگئيءَ ۾ پوندو آهي.“ حاجي عرس اُونڌ جبل سان لاڳاپيل ڏند ڪٿا به ٻڌائي ويو.