نواز شريف ۽ اجمل دهلوي لنڊن ڏانهن

نواز شريف ۽ اجمل دهلوي لنڊن ڏانهن
هفتو کن اڳ وزيراعظم بينظير ڀٽو ۽ ايم ڪيو ايم جي مذاڪراتي ٽيم جي اڳواڻ اجمل دهلويءَ جي وچ ۾ خفيه ڳالهين جي ڪا تصديق ته نه ٿي پر وزيراعظم سيڪريٽريٽ پاران اهڙي ڪنهن به ملاقات جي ترديد جون خبرون برابر اخبارن ۾ آيون. ڀلي ته کڻي اهڙي ملاقات کان انڪار ڪيو وڃي، ”دال ۾ ڪجهه نه ڪجهه آهي.“ مذاڪراتي ڌر جي سرڪاري اڳواڻ پروفيسر اين ڊي خان به وڌيڪ خط بازي نه ڪرڻ جي ڳالهه ڪئي ۽ چيو ته ان مان ڪجهه به هڙ حاصل نه ٿيندو. واقعي ايئن آهي به! ڪو نتيجو نڪرڻو هجي ها ته گذريل سال جي هيڏي ليٽر بازي ۽ منهان منهن ڳالهين دوران ڪو نه ڪو نتيجو نڪري اچي ها. چيو وڃي ٿو ته ڳالهين ۾ ”ڊيڊ لاڪ“ اچي ويو آهي. ڊيڊ لاڪ خود بخود ته ڪو نه پيو آهي. جڏهن ڪا نه ڪا ڌر ڳالهين ۾ سچي نه هوندي آهي ۽ شڪ شبها گهڻا هوندا آهن تڏهن ايئن ئي ٿيندو آهي. هاڻي اجمل دهلوي پنهنجي سياسي هيڊ ڪوارٽر لنڊن مان هدايتون وٺڻ ويو آهي، لنڊن ۾ ٻئي ڏينهن جي ٽڪيٽ ميان نواز شريف به ڪٽائي، گهڻو ممڪن آهي ته هي سٽون ڇپجڻ تائين نواز شريف به لنڊن ۾ الطاف حسين کي وڏو ڀاڪر پائي ملي چڪو هجي. بهرحال، هي هن جو نجي دورو نه آهي ۽ هو ايم ڪيو ايم مسلم ليگ ناتن ۽ حڪمت عملين تي ڪجهه ”عرض ڪرڻ“ ويو آهي. مسلم ليگ مهيني کن ۾ اهڙا ٻه چار ”عملي مظاهرا“ ڏيکاري چڪي آهي، جن جي بنياد تي هو الطاف حسين جي اها شڪايت دور ڪري سگهيو هوندو ته ايم ڪيو ايم جي خلاف نواز شريف آپريشن ڇو شروع ڪرايو!
جڏهن الطاف حسين جو ڀاءُ ناصر حسين ڪراچيءَ ۾ قتل ٿيو، تڏهن مسلم ليگ جي قيادت جنازي نماز ۾ شريڪ ٿي. تڏهن شايد اهو نواز شريف ئي هو جنهن الطاف حسين کي چيو هو ته ”حڪومت توسان قهر ڪري ڇڏيو!“ ٻئي موقعي تي (25 ڊسمبر 95ع) نواز شريف جي هٿ ٺوڪي قومي ڪانفرنس ۾ جيڪا اسلام آباد ۾ ٿي، اجمل دهلويءَ کي وڏي شان مان سان خاص دعوت ڏني وئي جنهن سان ايم ڪيو ايم پنهنجو ڪيس غير سرڪاري سطح تي ”قومي فورم“ ۾ شد مد سان پيش ڪري سگهي. ”قومي ڪانفرنس“ سنڌ جي ورهاڱي جي ڳالهه ڪئي ۽ سنڌ جو وڏو وزير جمهوريت جي مروج اصولن بدران ايم ڪيو ايم جي صلاح سان مقرر ڪرڻ جي ڳالهه ڪئي وئي. نواز شريف جا سڀ سياسي بيان ڪراچي ۽ ”مهاجر“ مسئلي جي چوڌاري ڦرن ٿا ۽ حڪومت تي سياسي بيانن جا برسٽ ڇوڙيا پيا وڃن. ايم ڪيو ايم جي حمايت ٿي رهي آهي. بين لفظن ۾ ايم ڪيو ايم جيڪا هونئن مڪمل طور دهشتگرد تنظيم جي صورت وٺي اڪيلي ٿي چڪي آهي، مسلم ليگ ان کي پنهنجي سياسي پليٽ فارم جي مدد ڏيئي رهي آهي ۽ يڪجهتيءَ جو سڀ کان تازو گڏيل مظاهرو 30 ڊسمبر تي ڪيو ويو جڏهن مذهبي جماعتن، مسلم ليگ ۽ ايمڪيو ايم گڏجي احتجاج ۽ وڳوڙ ڪيا.
مسلم ليگ، ايم ڪيو ايم ۽ مذهبي جامعتون ڀلي ته هن اتحاد کي حڪومت مخالف اتحاد جون هي اتحاد مڪمل طور تي ”ڀٽو دشمنيءَ“ تي ٻڌل آهي. جيستائين نظرين جو تعلق آهي ۽ معاشي پروگرامن جو ذڪر آهي، سڀ ڌريون لڳ ڀڳ ساڳين طبقن جو نمائنده آهن، سواءِ پ پ جي، جنهن سان ٻهراڙيءَ جي پورهيت طبقي جو ساٿ آهي. اهو ئي ساٿ ايم ڪيو ايم کي ”وڊيرن“ جي حڪومت نظر اچي ٿي. جيئن ته ٻهراڙيءَ جي پورهيت طبقي جي جمهوري طاقت کي ٽوڙڻ اڪيل سر ايم ڪيو ايم ۽ مسلم ليگ جي وس ۾ ناهي تنهنڪري اهي اچي پاڻ ۾ گڏيا آهن. نواز شريف ۽ الطاف حسين هاڻي ان ئي سوال تي ”قول ۽ اقرار“ ڪندا ته هو ڪيئن ۽ ڪهڙن واعدن تي گڏجي گڏيل تحريڪ هلائي پاڪستان جي ٻهراڙين جي جمهوري طاقت کي فساد جي ذريعي شڪست ڏين. هو سمجهن ٿا ته هن موقعي تي، قومي اتحاد جهڙو ڪو اتحاد ٺهي سگهي ٿو ۽ وري ڪو ضياءُ الحق ڀٽو حڪومت ختم ڪري سگهي ٿو.