0000-00-00
داخلا نمبر 1656
عنوان نيلسن منڊيلا ”زندھہ هيرو“ جي آمد
شاخ سنڌ ڪيس
پڙهيو ويو 8533
داخلا جو حوالو:
هن داخلا جون تصويرون نه مليون
نيلسن منڊيلا ”زندھہ هيرو“ جي آمد
3 مئي تي پاڪستان جي تاريخ ۾ هڪ ٻي اڻ ٿيڻي ڳالھہ ٿي آهي. هڪ آفريڪي ڪارو شخص جنھن جو نالو نيلسن منڊيلا آهي ۽ جيڪو پيريءَ سبب هلڻ کان بہ لاچار آهي. هن کي قائداعظم محمد علي جناح سان تشبيھہ ڏني وئي آهي. کيس توپن سان سلامي ڏني وئي ۽ پاڪستان جي هاڻوڪي بادشاھہ چيو، ”اڄ تاريخي ڏينھن آهي ڇاڪاڻ تہ اسان زندھہ هيرو کي مڃتا ڏيڻ لاءِ آيا آهيون!“ ماڻهن زوردار تاڙيون وڄائي نيلسن منڊيلا جي آجيان ڪئي. نيلسن منڊيلا ڏکڻ آفريڪا جو صدر آهي جنھن تي پڻ ساڳين انگريزن جو راڄ هو جن هندستان ۽ پاڪستان کي هڪ صديءَ تائين غلاميءَ جي زنجيرن ۾ جڪڙي ڇڏيو هو. اهي ئي انگريز جن هندستان جي تاجدار بہادر شاھہ ظفر کي رنگون ۾ قيد رکيو ۽ سنڌ جي ٽالپرن کي ڪلڪتي ۾.
تاريخ جي دلچسپ قلابازي اها آهي تہ انھن ئي مغلن ۽ ٽالپرن جي درٻارن ۾ آفريڪي عوام کي زرخريد غلام بڻائي رکيو ويندو رهيو ۽ انھن جي حيثيت انسان کان گهٽ سمجهبي هئي پر اڄ جڏهن ”زندھہ هيرو“ جو لقب ڏنو ٿو وڃي ۽ توپن سان سلامي ڏني ٿي وڃي! ان جا هٿ چمڻ جي ڪوشش ڪئي ٿي وڃي. ڪھڙي خبر تہ ان ساڳئي نيلسن منڊيلا جو ڪو ويجهو مائٽ، ڏاڏو يا پڙڏاڏو سنڌ، مصر يا بغداد جي بازار ۾ قيديءَ جي حيثيت ۾ وڪاڻو هجي. ڪھڙي خبر سنڌ جو هيرو جنرل هوش محمد شيدي جنھن جي بہادريءَ کان متاثر انگريزن کيس فوجي سلامي ڏيئي دفن ڪيو، اسان جي اڄوڪي ”زندھہ هيرو“ جي وڏڙن جو ئي اولاد هجي!
نيلسن منڊيلا تہ جناح، گانڌي، نہرو ۽ پٽيل جي شخصيتن کان متاثر ٿيو هو ۽ بقول سندس، هن سندن جدوجهد مان اتساھہ ورتو هو، پر سنڌ جي ماڻهن جو هڪ هيرو اڳ بہ نيگرو هو ۽ اڄ جڏهن اسان نيلسن منڊيلا جا قدم سنڌو ماٿريءَ ۾ ڏسون ٿا تہ اسان کي ”هوشو شيدي“ ياد اچڻ لڳي ٿو. مسٽر منڊيلا! جڏهن تون پنھنجي وطن موٽي ويندين. تڏهن آفريڪا جي عوام کي ٻڌائجانءِ تہ سنڌين جي هيرو جنرل هوش محمد شيديءَ جو اصل ڪٽنب آفريڪا ۾ ئي آهي ۽ سنڌ جو عوام سندن ٿورائتو آهي. مسٽر منڊيلا سنڌ جي عوام جي پاران آفريڪي عوام کي اهو بہ نياپو ڏجانءِ تہ هو جنرل هوش محمد شيديءَ جي وڏڙن کي ڳولڻ چاهين ٿا. اسان وٽ ڪو بہ اهڙو ماڻهو ڪو نہ آهي جيڪو هوشو شيديءَ پاران ”Roots“ لکي سگهي. اسان ڄاڻون ٿا تہ اسان جو هيرو آفريڪي نسل جو آهي. پر اي مسٽر منڊيلا آزاديءَ جي ويڙھہ وڙهندڙ هوش محمد شيدي ڀلي تہ ڪھڙي بہ رنگ ۽ نسل جو هجي، هو اسان کان وڌيڪ سنڌي هو. ڇاڪاڻ تہ هن سنڌ جي ڌرتيءَ کي ماءُ سمجهيو هو ۽ ان جي آزاديءَ لاءِ بي جگريءَ سان وڙهي جنگ جي ميدان ۾ زخمن کان چور چور ٿي ساھہ ڏنو هئائين!