نُڪو بٺي گبر بند

نُڪو بٺي گبر بند

جهانگارن ۽ ڪائيءَ جي وچ ۾ جهانگارن کان ست اٺ ميل جي پنڌ تي هڪ گبر بند ڊسمبر 1976ع ۾ دريافت ٿيو. اهو بند ڊاڪٽر لوئس فليم ۽ تاج صحرائي گڏيل طور لڌو. گبر بند 1500 فٽ ڊگهو، 40 فٽ ويڪرو ۽ 20 فٽ اوچو آهي. بند جا ٻه حصا آهن، هڪ حصو 180 فٽ ڊگهو روايتي بندن جهڙو آهي جيڪو سپيسر ڍوري جي پيٽ ۾ آهي. ان حصي جو ڳچ حصو 1976 ع کان اڳ ئي برساتن جي وهڪري ۾ لڙهي ويو هو، البت ٻيو حصو جيڪو پُشتن سان مضبوط ڪيو ويو هو، سلامت هو. بند کي ست عدد پُشتا آهن، هر هڪ پُشتو ٽي فٽ اوچو ۽ 5 فٽ ويڪرو آهي. پشتن جي اڏاوت جو هيءُ نمونو پنهنجي نوعيت ۾ ٻين کان جدا آهي.

هن گبر بند جي ڀرسان ئي سنڌو تهذيب سان لاڳاپيل شهر جو کنڊر به موجود آهي، جيڪو بيهڪ جي لحاظ کان ڪاساٽو ماڳ سان ملندڙ پر ان کان ننڍو آهي. کنڊر 300 x 500 فٽن جي ڊيگهه ويڪر ۾ آهي. ڊاڪٽر لوئس لکي ٿو ته، ”هن گبر بند جي ويجهڙ ۾ ڪا به تاريخي يا جديد آبادي نه آهي. گبر بند ۽ تاريخ کان آڳاٽي ماڳ جي پاڻت ۾ تعلق کي رد ڪري نٿو سگهجي.“