هاڻي چئه، عالمي دهشتگرد ڪير آهي

آچر 23 آگسٽ 1998ع

آئينو روزاني سچ ڪراچي

هاڻي چئه، عالمي دهشتگرد ڪير آهي

جنھن ڏينھن تي آمريڪي سرڪار پنھنجن سفارتخانن ۾ ڪم ڪندڙ عملدارن ۽ آمريڪي شهرين کي هدايت ڏني هئي تہ هو هڪدم پاڪستان، افغانستان، سوڊان ۽ تنزانيہ سميت ڪجھہ ٻين ايفروايشيائي ملڪن مان هڪدم موٽي اچن. ان ئي ڏينھن تي پاڪستان جي ماڻهن جي ذهن ۾ هڪ ڀيرو ٻيھر خطري جي گهنٽي وڳي هئي تہ ”شايد ڪا جنگ پئي لڳي!“ ڇو؟ جيئن برسات جي خبر جيت جڻن کي اڳواٽ پوندي آهي تيئن جنگ جي خبر سفارتخانن جي آمريڪي عملي کي پھرين پوندي آهي. پر هو خاموش هوندا آهن جو کين هر ڪم چپ چپات ۾ ڪرڻ لاءِ چيو ويو هوندو آهي. (بلڪه اڪثر ڪم سندن پنھنجن ئي هٿن سان ٿيل هوندا آهن.)

تاريخي افغانستان کي مستقبل جي سڀ کان وڏي آرڪيالاجيڪل سائيٽ ڪنھن ٺاهيو آهي؟ بوسنيا کانپوءِ سڀاڻي سڀ کان وڌيڪ اجتماعي قبرون (جن کي سنڌ ۾ ”گنج شهيدان“ چوندا آهن) ڪٿان کوٽي ڪڍيون وينديون؟ اڳي ڪامريڊ چوندا هئا، ”آمريڪي سامراج افغانستان ۾ سوويت يونين جي خلاف ان مهل تائين وڙهندو رهندو جيستائين هڪ بہ پاڪستاني سپاهي جيئرو آهي. هڪ بہ آمريڪي سپاهي اها جنگ نہ وڙهندو ڇاڪاڻ تہ آمريڪي شهري ۽ سپاهي تہ ”ديوتائن جا پٽ“ آهن. باقي دنيا جو عوام آمريڪي هٿيارن ۽ جنگ جي ميدانن ۾ ڪاٺيون ٿي ٻرڻ ۽ مرڻ لاءِ ڄائو آهي!

اڄ پاڪستان ۽ آمريڪا ۾ ايٽم بم جي سبب کان تڪرار آهي. سوويت يونين ٽٽي چڪو آهي ۽ افغانستان خود آمريڪا جي ڳچيءَ ۾ پئجي ويو آهي. جيئن پاڪستان جو عوام اڳڪٿيون ڪندو هو. الله خير ڪري! پاڪستان جو عوام ڄاڻي ٿو تہ افغانستان جا هٿياربند گوريلا، جيڪي اڄ افغانستان جي اندروني جهيڙن ۾ مصروف آهن ۽ اترين رياستن کان وٺي ايران تائين سڀني لاءِ خطرو بڻيل آهن. سڀاڻي انھن جون بندوقون، ٽينڪون ۽ ميزائيل پاڪستان جي هاءِ ويز تي ڊوڙندا.

مونيڪا ليونسڪي ۽ آمريڪي صدر ڪلنٽن جي وچ ۾ جنسي لاڳاپن کي عالمي ميڊيا کڻي آسمان تي کنيو آهي. منھنجي زبان مان اجايو ڪو غير پارليامينٽري لفظ نہ نڪري وڃي پر ايترو ضرور چوڻو پوندو تہ جتي مرد سان مرد جي جنسي لاڳاپن کي جائز سڏائڻ ۽ ڪرائڻ لاءِ اليڪشني واعدا ٿيندا هجن. اتي ڪلنٽن ۽ مونيڪا جي وچ ۾ رضا خوشيءَ سان اٺ ڏھہ ڀيرا جنسي لاڳاپا قائم ٿيڻ ڪھڙي معنيٰ ٿا رکن. چريا کريا آهيون پر سمجهون سڀ ٿا. آمريڪي صاحبن سمجهيو تہ اسان دنيا تي تاثر ٿا ڏيون تہ اسان دنيا جا سڀ کان وڏي ڊيموڪريسي آهيون، سڌريل آهيون، جنسي لاڳاپن جھڙي معمولي ڳالھہ (معمولي ڳالھہ ان ڪري ٿي چئجي تہ آمريڪي قانون ۾ رضا خوشيءَ سان جنسي تعلقات قائم ڪرڻ ڪو بہ ڏوھہ ڪونہي ۽ اهو سچ آهي تہ اتي اڪثر عورتون ۽ مرد ايئن ئي زندگي گذارين ٿا.) تي بہ ملڪ جي صدر کي ڳچيءَ کان جهلي عدالت ۾ آڻي سوال پڇون ٿا. هاڻي سي اين اين ۽ بي بي سي تي وڏا بحث هلن ٿا“ غير عورت ۽ مرد جا جنسي ناتا حرام آهن، ان ڪري ڪلنٽن شرعي ۽ اخلاقي ڏوهاري آهي!“ ڀائو! جڏهن ايشيائي ۽ مسلمان لوڪ ”حلال ۽ حرام“ جي ڳالھہ ڪن ٿا تہ ”بنياد پرست“ ٿي ٿا وڃن، هاڻي توهان جو ”حلال“ ٿيل ”حرام“ اسان جي سمجھہ ۾ نٿو اچي!

سو، دنيا ڏٺو تہ مهذب آمريڪا، دنيا جي سڀ کان وڏي ڊيموڪريٽڪ رياست، جنھن جي صدر کي عدالت جي ڪٽهڙي ۾ آندو ويو، ان آمريڪا پنھنجين سرحدن کان هزارين ميل پري واقع ٽن ملڪن جي شهرين تي ”ڪروز ميزائيل“ اڇلايا. سبب؟ دليل ڏنو ويو تہ ”آمريڪا جي مفادن کي خطرو هو.“ آمريڪا بہادر جپان کان عراق تائين ۽ آفريڪا کان ڏکڻ آفريڪا تائين بمن ۽ بارود جي جيڪا راند ڪئي آهي انھن ۾ (چوڻ تہ نہ کپي پر پڇڻ کان رهي نٿو سگهجي تہ) يھودي ۽ عيسائي ڇو نٿا مرن؟ مهذب آمريڪا هي ڪھڙي قسم جي تعصبي باھہ ۾ وڪوڙيل آهي. ”مونيڪا ڪلنٽن“ ڊرامو ٺيڪ ان وقت ڇو رچايو ويو جڏهن عربي سمنڊ ۾ بيٺل آمريڪي بحري جهازن پاڪستان، افغانستان ۽ سوڊان تي ميزائيل اڇلايا؟ وڏي تخت تي ويٺل بادشاھہ هڪ تير سان ٽي ٽي چار چار شڪار ڪندا آهن. جيڪڏهن ڪو ايئن ٿو سمجهي تہ پاڪستان، افغانستان ۽ سوڊان تي حملن جو اصل جوابدار ”ميان“ ڪلنٽن آهي تہ پوءِ اها غلطي ڪجھہ اهڙي ئي آهي جيئن پاڪستان ۾ سمجهيو وڃي تہ سڀ ڪجھہ ميان نواز شريف ٿو ڪري! جيئن پاڪستان جو حاڪم ڪو ”پراسرار“ ادارو آهي تيئن آمريڪا جو حاڪم بہ پراسرار ”پينٽاگون“ آهي. هو جيئن چاهين ٿا تيئن ٿئي ٿو. هو چاهين تہ پنھنجي ئي ”مسٽر پريزيڊنٽ“ کي ڪنھن اوچتي گوليءَ سان جڏهن بہ چاهين مارائي ڇڏين، جنھن جي مٿي تي جنھن بہ وقت تاج رکن ۽ جنھن بہ وقت چاهين ڪنھن کي مونيڪا اسڪينڊل ۾ اڙائي ڇڏين. اسان کي پريزيڊنٽ نڪسن وارو اسڪينڊل بہ ياد آهي جنھن تي الزام هو تہ هو ٽيليفون رڪارڊ ڪرائيندو هو. ٽيليفون مسٽر نڪسن پاڻ تہ رڪارڊ ڪو نہ ڪيا هوندا، اهو ڪم تہ خود پينٽاگون وارا ئي ڪري رهيا هوندا.

پاڻ فردن تي ويھي ڇا ڳالهايون؟ آمريڪا کي پاڪستان، سوڊان ۽ افغانستان مان ڪھڙو حقيقي خطرو هو؟ تنزانيہ جي ڪنھن عمارت ۾ بم ڦاٽو، ان جي ويجهو واقع آمريڪي سفارتخاني کي بہ نقصان ٿيو. فقط ايتري ڳالھہ کي بنياد بنائي عالمي نشرياتي ادارن ۽ پراسرار پينٽاگون 25 عدد ”ٽام هاڪ“ ڪروز ميزائيل ڇوڙيا، سو بہ افغانستان، سوڊان ۽ پاڪستان جي شهرين تي! ڇا اسان کي حق ناهي تہ ڊيموڪريسي ۽ انساني حقن جي ٺيڪيدار آمريڪا کان پڇون تہ سوڊاني دوا ساز ڪارخاني ۾ ڪم ڪندڙ مزدورن، عام شهرين، افغانستان جي شهرن ۾ رهندڙ عام شهرين ۽ پاڪستانين کي ڪھڙي گناھہ جي سزا ۾ ڪروز ميزائيل هڻي ماريو ويو؟ ڇا آمريڪي شهري سوڊان، افغانستان، عراق ۽ پاڪستان جي شهرين کان وڌيڪ مقدس ۽ عظيم آهن؟ ڇا هو ”خدا جا پٽ“ آهن؟

پاڪستان جي خطي تي آمريڪي ميزائيل ڪريا آهن، ڪھڙو ثبوت آهي تہ ”غلطيءَ سان ڪريا آهن؟“ ان بمباريءَ تي پاڪستان رسمي احتجاج ڪيو ۽ آمريڪا معذرت ڪري ورتي. پاڪستاني شهري جيڪي آمريڪي دهشتگرديءَ جو شڪار ٿي قبرن ۾ دفن ٿي ويا آهن خون معاف ٿي ويا، صرف هڪ لفظ ”معذرت“! سان اهڙيون معذرتون تہ تنزانيہ وارا بہ ڪري پيا سگهن. ڇا، ساڳيءَ ريت جيڪڏهن پاڪستان جو ڪو ميزائيل آمريڪا جي سر زمين تي ڪري تہ پاڪستان جي معذرت قبول پوندي؟

آمريڪا کي پنھنجن روين تي هڪ ڀيرو وري سوچڻو پوندو تہ دهشتگرديءَ کي روڪڻ جي بہاني هو وڏيون خوفناڪ ڪارروايون ڪري ڪري هاڻي پاڻ سڀ کان وڏو عالمي دهشتگرد بڻجي ويو آهي. ايئن تہ ڌاڙيل ۽ داداگير ئي ڪندو آهي تہ پرائي گهر ۾ گهڙي گهر ڀاتين کي ماري ڪٽي هليو وڃي ۽ ايئن چوي تہ ”هيءَ مار ياد رکجو ڇو تہ توهان منھنجن مفادن سان ٽڪر کاڌو آهي.“

آمريڪا پاڻ کي ڀلي ”جمهوريت پسند“ سڏائي پر ان جو قومي پکي ”باز“ آهي جيڪو فقط شڪار ڪري ۽ جهٽ هڻي ڄاڻي ٿو. اها ڳالھہ قبول ڪري سگهجي ٿي تہ مسلم دنيا ۾ شدت پسندي آئي آهي پر اصل دهشتگردي ڪير پيو ڪري ۽ مسلم دنيا کي پنھنجو رويو سخت کان سخت ڪر�