هندي اسٽائل فساد ۽ ايم ڪيو ايم

هندي اسٽائل فساد ۽ ايم ڪيو ايم

الطاف حسين ايم ڪيو ايم کي نئين لائين ڏيڻ شروع ڪئي آهي ته هاڻي ٽيڪس ادا نه ڪرڻ جي مرحلي طرف اچجي. 21 سيپٽمبر تي بيان جاري ڪري الطاف حسين ٻن مهاجر عورتن جي گرفتاري تي ”پر امن يوم احتجاج“ جو حوالو ڏيندو (جنهن ۾ گهٽ ۾ گهٽ 6 ماڻهو قتل ٿيا، 4 گاڏيون ساڙيون ويون، 22 ماڻهو زخمي ٿيا ۽ سرڪاري عملدارن جي گهرن تي راڪيٽ لانچرن سان حملا ٿيا) هن فرمايو ته ”احتجاج شروعات آهي، هاڻي ٽيڪس نه ڏيڻ تي غور ڪنداسين.“
الطاف حسين جڏهن به ڪنهن اڳرائيءَ جو سڏ ڏيندو آهي ته هو ڪجهه اهڙا ضرور ادا ڪندو آهي، جنهن سان ”مهاجرن“ جو رت ٽهڪڻ شروع ڪري. ڪالهه هن ساڳيا لفظ ورجايا ”غيرت... ماءُ، ڀيڻ ۽ ڌيءُ جي آبرو، رت جو آخري ڦڙو، مهاجر نوجوانن جو قتل.“ هن چيو ته مهاجر نوجوانن جي سر جي قيمت هئڻ جو سلسلو بند نه ڪيو ويو ته احتجاج به ٿيندو، هڙتالون ۽ ڦيٿا جام به ٿيندو، حڪومت پوءِ به نه مڙي ته مهاجر عوام ٽيڪس نه ڏيڻ تي به غور ڪندو.“
”پر امن هڙتال“ ڪرائيندڙ ڪراچيءَ جو ”گانڌي جي“ هاڻي ٽيڪس ادا نه ڪرڻ جي مهم هلائڻ طرف وڌي رهيو آهي. ”مهاجر عوام“ ڪو ٻيو نه خود الطاف حسين آهي. هندي اسٽائل فسادن جو سلسلو لنڊن ۾ ويٺل الطاف حسين جي مٿي ۾ ڪير وجهي رهيو آهي؟ ٽيڪس ادا ڪرڻ کان انڪار جو خيال جناح صاحب جو ڪو نه هو جنهن کي ”مهاجر عوام“ ڪالهه تائين پنهنجو محسن سمجهندو هو. ٽيڪس ادا نه ڪرڻ ۽ جيئن حڪومت چوي ان جي ابتڙ عمل ڪرڻ، اصلي گانڌي جيءَ جي ذهن جي پيداوار آهي. گهيراءُ جلاءُ ۽ ڌرڻو به هندستاني سياست مان پاڪستان آيا ۽ هاڻي ٽيڪس ادا نه ڪرڻ جو خيال ملڪ جي ماڻهن ۾ وڌو پيو وڃي. ڇا الطاف حسين هندستاني گانڌيءَ جي طريقت تي هلي رهيو آهي؟ گانڌيءَ جيءَ جهڙو ذهن ۽ گڻ الطاف حسين وٽ ”خيرڪا“ آهن. تدبر جي لحاظ کان الطاف ۾ اها صلاحيت آهي ئي ڪو نه ته هو گانڌيءَ جي جتي به کڻي سگهي! ته پوءِ اهو ڪير آهي جيڪو الطاف جي مغز ۾ ”ٽيڪس ادا ڪرڻ کان انڪار“ واري بغاوت ڀري رهيو آهي؟
الطاف حسين ”مهاجرن“ جي ذهن ۾ اهو ڪجهه پوکي رهيو آهي جنهن جا ٻج لنڊن ۾ ويٺل ڪي پراسرار ماڻهو کيس ڏئي رهيا آهن. اهي پراسرار ماڻهو ڪير آهن؟ شايد اهي ماڻهو هندستاني تحريڪن خاص طور تي تامل ٽائيگرن جي ويڙهه ۽ گانڌيءَ جي شهري نافرماني وارين تحريڪن جو ڳوڙهو اڀياس ڪندڙ آهن؟