ابڙو اڪيڊمي Abro Academy
2020-11-04
داخلا نمبر 916
عنوان واهيءَ لڳ روميون قبرستان
شاخ منڇر گورک گاج دنيا
پڙهيو ويو 1210
داخلا جو حوالو:
واهيءَ لڳ روميون قبرستان
واهيءَ لڳ روميون قبرستان
واهيءَ لڳ روميون قبرستان
واهي پانڌيءَ کان ڪجهه اتر اولهه ۾ جبل جي آخري پاسراٽين جي هڪ سلسلي تي ڪي گهاڙي قبرون آهن جن کي مقامي ماڻهو ’روميون‘ سڏين ٿا. شايد انهن ئي آثارن کي عزيز ڪنگراڻيءَ گورن، گبرن يا زرتشتين سان منسوب ڪيو آهي. پر اهي مسلمانن جون قبرون آهن، جيڪي پنج ڇهه صديون پراڻيون به ٿي سگهن ٿيون. اهي ڪي خوبصورت گهاڙيون نه آهن ۽ نه وري هي ڪو وسيع قبرستان آهي. ڪن قبرن جا رڳو بنياد باقي بچيا آهن، ٻين جا پٿر کٽل آهن، هتي ڪا رانڪ وغيره يا چؤديواري به نه آهي. بس! ڪي ٻه منزله گهاڙيون ڀڳل ٽٽل حالت ۾ هيڏانهن هوڏانهن پکڙيون پيون آهن. انهن جي بنياد جا پٿر زمين تي ليٽيل حالت ۾ رکيا ويا آهن، جن تي پاسيرا بلاڪ بيهاري، انهن جي مٿان ڍڪڻ جون سِلائون / بلاڪ رکيا ويا هئا. ڪن قبرن مٿان ڪرنگهيدار تعويزي پٿر (گهوڙيون) ڏسجن ٿيون. هڪ قبر تي ’نوتڪ يوسف‘ اُڪريل آهي، هڪ قبر جي تعويزي پٿر تي سيرانديءَ واري پاسي کان ’الله‘ لکيل آهي.