2020-11-04
داخلا نمبر 914
عنوان واهي پانڌي شهر
شاخ منڇر گورک گاج دنيا
پڙهيو ويو 1347
داخلا جو حوالو:
هن داخلا جون تصويرون نه مليون
واهي پانڌي شهر
سنڌ ۾ جبل جي وَٽ سان سڀ کان آباد ۽ خوشحال ڳوٺ واهي پانڌي ئي آهي. واهي نئه نريءَ جي پيٽ ۾ وهندڙ چشمو آهي پر جڏهن اها واهي جبلن مان ٻاهر نڪري شاخون شاخون ٿئي ٿي، تڏهن انهن مان هڪ شاخ جو نالو ’واهي پانڌي‘ آهي ڇو ته ان شاخ تي ’پانڌي لغاري‘ ويٺل هو. هن علائقي ۾ آباديءَ جو ذريعو نئه نريءَ جي پيٽ مان صدين کان جاري واهي آهي. ڪجهه عرصو اڳ تائين هي پاڻي ٺيڪ طرح استعمال ڪونه پئي ٿيو پر هاڻي ان کي ڪافي منظم انداز ۾ استعمال ڪيو پيو وڃي. هن ڳوٺ جي اڪثر ماڻهن عرب ملڪن ۾ وڃي نوڪريون ڪيون ۽ اتان جيڪي ڪجهه ڪمايو، اها ميڙي چونڊي پنهنجي علائقي ۾ جيئڻ جا ذريعا سڌاريا ۽ ڏسندي ڏسندي هي چڱو خاصو شهر ٿي ويو آهي. 86-1985 ۾ هتي بجلي آئي ته هر شئ بدلجي وئي. هاڻي هتي بجلي، پاڻي، ٽيلي فون، سيليولر فون، اسپتال، اسڪول، پيٽرو پمپ ۽ عوامي ٽرانسپورٽ جو ن سهوليتون اچي ويون آهن ۽ ماڻهو فقط هڪ ڪلاڪ جي اندر اندر واهي پانڌيءَ کان دادو پهچي سگهي ٿو. هاڻي ته واهي ۽ جوهيءَ جي وچ مان لنگهندڙ نئه گاج جي مٿان پُل به ٺهي وئي آهي. جيئن ته گورک ڏانهن نئون روڊ به واهي پانڌيءَ مان ڪڍيو ويو آهي، انڪري هن شهر جي اهميت اڃا به وڌي وئي آهي ۽ توقع آهي ته واهي پانڌي جلد ئي جوهيءَ وانگر شهري ڏِک ڏيڻ لڳندو.
واهي چڱو خاصو زرعي شهر ٿي ويو آهي، ماڻهن ٽيوب ويل هڻي زرعي انقلاب آڻي ڇڏيو آهي پر ان سان جر هيٺ لهندو پيو وڃي ۽ آبادگارن کي اندازو ئي نه آهي ته ان ريت اڳتي هلي واهي شهر کي ڪهڙو هاڃو ڏسڻو آهي.