ابڙو اڪيڊمي Abro Academy
2020-11-06
داخلا نمبر 1217
عنوان ورلڊ ڪپ ۽ دهشتگرديءَ جو ماحول
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1140
داخلا جو حوالو:
هن داخلا جون تصويرون نه مليون
ورلڊ ڪپ ۽ دهشتگرديءَ جو ماحول
ورلڊ ڪپ ۾ باقي ڪي ڏينهن وڃي بچيا آهن، وزيراعظم کان وٺي قوم جو عام نوجوان وڏي تجسس ۾ آهي. وزيراعظم ته ذري گهٽ اها دعوا به ڪري چڪي آهي ته پاڪستان ئي ورلڊ ڪپ کٽندو. دعاگو ته سڄي قوم آهي ته ايئن ئي ٿئي پر ورلڊ ڪپ کان اڳ ۾ جيڪو سياسي ماحول جڙي رهيو آهي ۽ دهشتگرديءَ جون ڌمڪيون وصول ٿي رهيون آهن، اهي هن ورلڊ ڪپ جي تفريحي ماحول کي تباهه ڪرڻ لاءِ ڪافي آهن. پاڪستان يا هندستان يا ٻيا ملڪ جيڪي ورلڊ ڪپ کٽڻ لاءِ وڏي ڪسرت ڪري رهيا آهن ڪاميابيءَ جون اميدون ته وڏيون رکي ويٺا آهن پر ڪاميابي تڏهن ٿيندي جڏهن دهشتگرديءَ جو ڪو واقعو نه ٿئي.
مولوي صاحب ٻڌائيندا آهن ته رمضان شريف ۾ ”شيطان وڻ سان ٻڌل“ هوندو آهي پر اها شايد اڳئي زماني جي ڳالهه آهي. اڄڪلهه رمضان شريف هلي رهيو آهي پر نعيم شري، فهيم ڪن ڪٽو ۽ ٻيا دهشتگرد آزاد آهن ٻڌجي پيو ته اهي ڪو نئون 90 تيار ڪرڻ جي چڪر ۾ آهن. ڪراچيءَ وارن کي لاش به برابر ملي رهيا آهن، روايت کان ڪجهه گهٽ سهي، پر چئي نٿو سگهجي ته اها گهٽتائي حڪومت جي وٺ پڪڙ سبب آهي يا رمضان شريف جي رحمت سبب! شيطان رڳو پاڪستان ۾ ئي نه، ڀارت ۽ سريلنڪا ۾ به سرگرم آهي ۽ انهن ملڪن ۾ هن جو نالو ايل ٽي ٽي اي ۽ شوسينا آهي.
عمران خان کي دهشتگرديءَ جي ڳڻتي نه آهي پر اها تنقيد ضرور ڪري ٿو ته ”اسٽيڊيم جي مرمت تي پئسا وڃايا ويا آهن“ ايم ڪيو ايم جي مذاڪراتي ٽيم جو اڳواڻ ميان اجمل دهلوي پهرين حڪومت کي ڌمڪي ڏئي ٿو ته ايم ڪيو ايم جي ڪارڪنن خلاف سيڪيورٽي آپريشن بند نه ٿيڻ جي صورت ۾ اها تنظيم ورلڊ ڪپ ۾ خلل وجهي سگهي ٿي.“ دهلويءَ فرمايو، ”جيڪڏهن حڪومت ڇاپن، گرفتارين ۽ مقابلن ۾ موتن جو سلسلو جاري رکيو ته پوءِ اسان زبردست احتجاج ڪنداسون جنهن ۾ هڙتالون ۽ مئچن جو بائيڪاٽ به شامل هوندو.“ اها ڌمڪي ان وقت ڏني وئي آهي جڏهن پرڏيهي ٽيمون پاڪستان پهچڻ شروع ٿي ويون آهن. دهلوي صاحب پوءِ پنهنجي بيان تان ڦري ويو ۽ چيو، ”مون ايئن ڪو نه چيو هو، مون ته ايئن چيو هو ته جيڪڏهن مئچن دوران تحويل ۾ موت ٿيا ته ممڪن آهي ته ڪجهه ماڻهو رد عمل ڏيکارن!“ ايم ڪيو ايم جو اڳواڻ پهرين ته هڪ نيوز ايجنسيءَ سان ڳالهائڻ کان ئي انڪار ڪري ويو پر پوءِ هن چيو ته مون هيئن نه، هونئن چيو هو. دهلوي صاحب ”هي“ چيو هجي يا ”هو“ چيو هجي، هن دهشتگردن کي اڻسڌيءَ يا سڌيءَ طرح هڪ ”لائين“ ضرور ڏني آهي ۽ گڏوگڏ اها ڌمڪي به، جنهن کان انڪار ڪري ٿو.
جنون جا دورا رڳو پاڪستان جي شدت پسندن کي ڪو نه پيا آهن، ڀارتي انتهاپسند تنظيم شوسينا جو بال ٺاڪري به آپي مان نڪري ويو اهي ۽ چوي ٿو ته ”جيڪڏهن پاڪستاني رانديگرن ڀارت جي زمين تي پير رکيا ته کين هوائي اڏي تي ماريو ويندو يا سندن ٽنگون ڀڳيون وينديون.“ اها ڌمڪي هن ڪنهن ڪارنر ميٽنگ ۾ ڪو نه ڏني آهي، هن دور درشن کي انٽرويو ڏيندي چيو ”جيڪڏهن پاڪستاني ٽيم ورلڊ ڪپ جو سيمي فائنل کيڏڻ ارت آئي ۽ اسٽيڊيم ۾ داخل ٿي ته اسٽيڊيم کي بم سان اڏايو ويندو.“ بال ٺاڪري ڪشمير جي جنگ ڪرڪيٽ جي ميدان ۾ وڙهن چاهي ٿو. سندس مطالبو آهي ته ”پاڪستان کي ڪشمير ۾ مداخلت ڪرڻ جي سزا ڏني وڃي.“ هوڏانهن پاڪستان جي هڪ عملدار بال ٺاڪري کي ”ديوانو“ قرار ڏيئي چيو آهي ته ”پاڪستاني ٽيم ڀارت ضرور ويندي ۽ ٽيم جي حفاظت ڪرڻ ڀارتي حڪومت جو فرض اهي.“
دهشتگردي ۽ ڪرڪيٽ ورلڊ ڪپ ڇوري ۽ گدري جو مثال بڻجي ويا آهن. ان وڪڙ ۾ سريلنڪا ۽ آسٽريليا به اچي ويا آهن. آسٽريليا جي رانديگرن کي سريلنڪا ۾ مئچ کيڏندي دهشتگرديءَ جو خوف آهي ۽ هو ”جوکم“ کڻڻ يا نه کڻن بابت اڃا سوچي رهيا آهن. جنهن ملڪ ۾ هڪ ڌماڪي سان 200 ماڻهو مرن ۽ 1500 زخمي ٿين اتي ڪهڙا ميڙا ۽ ڪهڙا ملاکڙا! دهشتگردن ته اهڙن موقعن جي انتظار ۾ هوندا اهن ته ڪٿي ٿا ماڻهو مڙن ۽ جي ان ميڙ ۾ پرڏيهي به هجن ته پوءِ کين ٻيو ڇا گهرجي؟ ان هوندي به زمبابوي وارن چيو آهي ته هو ڪولمبو ضرور ويندا ۽ هو ڌماڪن کان نٿا ڊڄن!
سريلنڪا ۽ ڀارت وارا پنهنجن ملڪن ۾ دهشتگردن کي ڪيئن منهن ڏيندا؟ اهو ته هو ئي ڄاڻن، پاڪستان پنهنجي ملڪ ۾ ڪهڙا اپاءَ پيو وٺي؟ نصيرالله بابر حڪم ڪيو آهي ته اسٽيڊيم ۾ گڙٻڙ ڪندڙ کي ڏسندي ئي گولي هنئي وڃي! پاڪستان ۽ سريلناڪ جا دهشتگرد هن وقت پنهنجي بقا جي جنگ ۾ ڇتا ٿي پيا آهن ۽ لڳي ٿو ته اهي هن وقت پنهنجي پوري قوت ۽ تنظيم ڪٺي ڪري آخري جنگ وڙهي رهيا آهن. اها آخري جنگ ۽ عالمي ڪرڪيٽ جو ميدان هن مهل آمهون سامهون بيٺل آهن. مئچون ته اڃا پري پيون آهن، هتي اڳواٽ ڪم ٿي ويا آهن. پاڪستاني ٽيم پاڻ کي فارم ۾ رکڻ ۽ آڻڻ لاءِ مشقون ڪري رهي آهي. انهن مشقن جي ٻئي رائونڊ دوران 15 هزار ماڻهو گرائونڊ ۾ داخل ٿي ويا. رانديگرن کي ڀڄي پاڻ بچائڻو پيو ۽ خوف وچان ڏيڍ ڪلاڪ تائين ڊريسنگ روم ۾ ڏڪندا رهيا پر پوليس وارا شايد اهو ڏسڻ آيا هئا ته ”ڇوڪرا“ صحيح طرح مشقون ڪري رهيا آهن يا نه!
پاڪستان جي پوليس کي اسٽيڊيم جي ڊيوٽي ڏيڻ مهل سمجهائي موڪلڻ کپندو هو ته جوانو! رانديگرن پنهنجي راند جي مشق ڪندا پر توهان کي امن قائم رکڻ جي مشق ڪرڻي آهي ۽ اوهان کان ئي ظهور ۾ ايندڙ سڀني واقعن تي نظر رکي پنهنجي رٿابندي ڪيو! فرض ڪيو ته سڀاڻي ڪرڪيٽ جي اصلي مقابلن مهل دهشتگرد يا وڳوڙي پنهنجي اصليت ڏيکارڻ لاءِ ايئن ڪاهي پون ته پوءِ توهان ڇا ڪندو؟ ڇا ان مهل به نصيرالله بابر وارو اهو حڪم ڪارگر رهندو ته گڙٻڙ ڪندڙ کي ڏسندي ئي گولي هنئي وڃي!