وفاقي بدران قومي جمهوريت ڇو نہ؟

'>زراعت ۽ صنعت نيٺ تہ ڪو ممڻ مچائيندي! واپڊا وارا وري بہ ٻين بندن جي اڏاوت جون ڳالهيون ڪرڻ نڪتا آهن. پاڻيءَ جي هن سخت کوٽ واري حالت ۾ سنڌ کان اڃا بہ قرباني جي گهر ڪئي پئي وڃي! ڳالھہ تہ شرم جي آهي پر جنھن کي اچي. سو، پاڪستان جو حل عوامي قيادت آهي. 1973ع وارو آئين بہ ضمانتون ڏيڻ ۾ ناڪام ويو آهي. ننڍا صوبا بنہه سوڙها ٿي چڪا آهن. هاڻي، سياسي آزادي بحال ڪرڻ جو وقت اچي ويو آهي... ۽ سڀ کان بنيادي ۽ آخري ڳالھہ اها آهي تہ شايد هاڻي ان مطالبي تي سوچيو وڃي تہ پاڪستان کي هڪ اهڙي قومي اسيمبلي جي ضرورت آهي جنھن ۾ سڀني صوبن مان هڪ جيتري نمائندگي هجي. هن وقت آئين موجب قومي اسيمبلي (عملي طرح) سينيٽ تي حاوي آهي، جنھن جي معنيٰ اها ئي آهي تہ پاڪستان ۾ اهو ئي ڪجھہ ٿيندو جيڪو پنجاب جي مرضي موجب هوندو. قومي اسيمبلي ۾ سڀني صوبن جي هڪ جيتري نمائندگي تمام ضروري ٿي پئي آهي. توهان ان کي قومي جمهوريت چئو يا کڻي ٻيو ڪجھہ.

سوال وري بہ اهو آهي تہ ان تي عمل ڪير ڪرائيندو؟ ڀلي تہ کڻي سياسي جمود موجود آهي، آئون علي قاضي صاحب سان ان ڳالھہ تي سهمت آهيان تہ انفارميشن ٽيڪنالاجي جمود ٽوڙي رهي آهي، جيڪڏهن ايئن آهي تہ پوءِ آئين ۾ بہ تبديلي آڻڻي پوندي. جيڪڏهن قيادت جمهوري رستو اختيار نہ ڪيو تہ پوءِ فيصلو وقت ڪندو، جيڪو ڪنھن انتظار ۾ بيھي ڪو نہ رهندو آهي ۽ اهو بہ ياد رکيو وڃي تہ وقت جا فيصلا تمام سخت هوندا آهن.