ابڙو اڪيڊمي Abro Academy
2020-11-05
داخلا نمبر 1120
عنوان ووٽر، اميدوار ۽ سياسي پارٽين وارا جاڳن!
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1131
داخلا جو حوالو:
هن داخلا جون تصويرون نه مليون
16 نومبر 1995ع
ووٽر، اميدوار ۽ سياسي پارٽين وارا جاڳن!
سڄي ملڪ ۾ انتخابي فهرستن جي تياريءَ جو ڪم جاري آهي پر بي شمار ڪٽنب اڃا تائين انتظار ۾ آهن ته اليڪشن ڪميشن جو ڪو اهلڪار ايندو جيڪي اچي کين فارم پهچائيندو ۽ فارم ڀرائي، وصول ڪري ويندو. ٿي سگهي ٿو ته اليڪشن ڪميشن جا ايماندار، سچا ۽ محنتي اهلڪار پنهنجي ذميواري پوري ڪري رهيا هجن پر سرڪار ڪو به ڪم 100 سيڪڙو مڪمل ڪري نه سگهندي، خاص ڪري ان وقت جڏهن تعصب جو ڄار ذميوار اهلڪارن جي ذهنن کي جڪڙي چڪو هجي. اخبارن جون خبرون عوامي دانهن جو پڙاڏو بڻجي اليڪشن ڪميشن تائين پهچڻ جي ڪوشش ڪري رهيون آهن ته اڌو اڌ سنڌ ۾ اليڪشن ڪميشن جا اهلڪار اڃا تائين نه پهتا اهن پر شايد اليڪشن ڪميشن سنڌ سمجهي نٿي سگهي! لياريءَ جون انگڙ ونگڙ گهٽيون ۽ پاڙا ته ڇڏيو ڊفينس، ڪلفٽن ۽ سوسائٽيءَ جهڙن علائقن ۾، جتي گهٽيون ۽ پاڙا جديد رٿابنديءَ سان ٺهيل آهن، اتان به شڪايت پهچي رهي آهي ته اليڪشن تعصب جي عينڪ پائي نڪتي آهي ۽ لڳ ڀڳ هر اهو گهر ڇڏي وئي آهي جنهن ۾ سنڌي ڳالهائيندڙ ڪٽنب رهيل آهن.
سجاڳيءَ جي دعوا ڪندڙ به ننڊ پيا آهن ۽ ڪنهن کان به اهو نه پڳو آهي ته اليڪشن ڪميشن جي در تي وڃي انصاف جو گهنڊ وڄائي! سياسي پارٽيون جيڪي اليڪشن جي مهل تي ووٽر جو در کڙڪائي ووٽ جي خيرات پنڻ اينديون آهن، اهي به هن وقت ستيون پيون آهن، ڪنهن به سياسي تنظيم کي احساس نه آهي ته سندس ووٽر لسٽن ۾ داخل ٿيڻ کان ئي رهجي رهيا آهن. جيڪي اڄ رهجي ويا سي سڀاڻي ڪهڙو ووٽ ڏيئي سگهندا؟ هر ماڻهوءَ کي اهو شعور ڪو نه آهي ته کيس ووٽر لسٽ ۾ پنهنجو نالو داخل ڪرائڻ لاءِ ڪيڏانهن وڃڻ گهرجي؟ اليڪشن ڪميسن به اهو چئي پنهنجو فرض پورو ڪري ڇڏيو ته هر ووٽر پنهنجو نالو داخل ڪرائي، پر ڪٿي اچي؟ ڇا سڄي سنڌ ڪراچي، حيدرآباد، سکر ۽ لاڙڪاڻي جي ٽڪيٽ وٺي؟
عوام انتظار ۾ آهي ته ڪا آسماني مدد ايندي ۽ هڪ هڪ ماڻهوءَ جو نالو ووٽر لسٽ ۾ داخل ٿي ويندو. اليڪشن ڪميسن سمجهي ٿي ته اخبار ۾ اعلان ۽ وضاحت ڪرڻ سان سڄي ملڪ جا اهل ووٽر، ووٽر لسٽ تي چڙهي ويندا ۽ سياسي پارٽيون سمجهن ٿيون ته ووٽر لسٽ تي نالو چاڙهائڻ سندن ذميواري نه آهي. ان صورت ۾ ڇا ٿيندو؟ ظاهر آهي ته بنيادي مقصد ئي فوت ٿي ويندو. ان صورت ۾ هر هڪ فرد، هر هڪ پارٽي ۽ اليڪشن ڪميشن کي اڳتي وڌي پنهنجو ڪم پورو ڪرڻو پوندو. اليڪشن ڪميشن کي هاڻي کان ئي سياسي پارٽين کي اپيل ڪرڻي پوندي ته اهي ووٽرن جا نالا داخل ڪرائڻ ۾ ڪميشن جي مدد ڪن۽ خود سياسي پارٽين کي پنهنجي ليکي پنهنجي ووٽرن کان گهر گهر وڃي پڇڻو پوندو ته ڇا سندن نوان فارم ڀريا ويا آهن؟ جيڪڏهن نه ته کين فارم ڏيارڻ، ڀرڻ ۽ داخل ڪرڻ ۾ مدد ڏيڻي پوندي.
اليڪشن ڪميشن فقط ايترو فرمايو آهي ته ماڻهن کي ڏنل نوان فارم کانئس واپس وٺڻ جي آخري تاريخ 30 نومبر آهي ان ڪري ان تاريخ تائين ماڻهو ڪميشن طرفان مقرر ڪيل اهلڪارن جي ٻيهر آمد جو انتظار ڪن پر، سوال اهو آهي ته جن ماڻهن تائين ۽ جن علائقن ۾ اليڪشن ڪميشن جا ”ذميوار عملدار“ اڃا تائين پهتا ئي ڪو نه آهن، اتي جا ماڻهو ڇا ڪن؟ ڪميشن آفيس جا ڏس پتا به ماڻهن تائين پوريءَ طرح ڪو نه پهتا آهن، صرف ايترو چيو وڃي ٿو ته ضلعي جي اسسٽنٽ اليڪشن ڪمشنر/رجسٽريشن آفيسر جون آفيسون اهو ڪم ڪرڻ لاءِ ذميوار آهن پر اهي آفيسون ڪٿي آهن؟ ڇا انهن جو ڪو پوسٽل ڏس پتو ڪونهي جيڪي اخبارن ۾ شايع ڪري شهرين کي گهٽي گهٽي رلڻ کان بچائجي؟
30 نومبر اچي مٿان پهتي آهي. ضرورت ان ڳالهه جي آهي ته رهجي ويل ماڻهو پنهنجي مڙسي ڪن ۽ ضلعي اليڪشن آفيسون ڳولي هٿ ڪري، فارم وٺي، ڀرائي، داخل ڪن. هي موقعو انهن پارٽين ۽ اميدوارن لاءِ به تمام ڪارائتو آهي جيڪي ايندڙ مڪاني، صوبائي يا قومي اسيمبلين جي چونڊن ۾ دلچسپي رکن ٿا. کين اڳتي وڌڻ گهرجي، ماڻهن کي سندن نالا ووٽر لسٽن ۾ شامل ڪرائڻ ۾ مدد ڪرڻ گهرجي ۽ پوءِ کين ان وقت جو انتظار ڪرڻ گهرجي جڏهن اهي ئي ماڻهو کين پنهنجو ”حقيقي همدرد“ سمجهي، ووٽ جو حقدار سمجهندا.