2020-11-05
داخلا نمبر 1064
عنوان وڏو وزير پنهنجي حڪم تي عمل ڪرائي سگهندو؟
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1098
داخلا جو حوالو:
هن داخلا جون تصويرون نه مليون
29 سيپٽمبر 1995ع
وڏو وزير پنهنجي حڪم تي عمل ڪرائي سگهندو؟
وڏي وزير سيد عبدالله ساهه همٿ ڪئي آهي جو هن سنڌ ۾ غير قانوني طور رهندڙ سڀني پرڏيهين جا ووٽ خارج ڪرڻ جو حڪم ڏنو آهي. کين الاٽ ٿيل زمينون رد ڪرڻ ۽ ٻيهر ڪا به زمين خريد ڪرڻ جو حق کسڻ اهڙا قدم آهن، جيڪي پهرين ڏينهن تي کڻڻ گهربا هئا. دير سان ئي سهي ڪو سٺو قدم کنيو ويو آهي، پر ڳالهه اتي نٿي کٽي. سرڪاري حڪم تي بيشمار جاري ٿيندا آهن پر اهي اڳتي هلي محض ”سياسي بيان“ ثابت ٿيندا رهيا آهن. سنڌ جي ماڻهن جو مطالبو اهو ناهي ته غير قانوني پرڏيهين کي نيڪالي ڏيڻ جا حڪم جاري ڪيا وڃن، مطالبو اهو آهي ته کين ٻاهر ڪڍيو وڃي.
ان ۾ ڪو به شڪ نه آهي ته غير ملڪي ماڻهو جيڪي غير قانوني طريقن سان پاڪستان جي شهريت حاصل ڪري ملڪيتون ۽ ووٽ جو حق وٺي چڪا آهن، هن حڪم نامي جي مزاحمت ڪندا. اها ڳالهه حڪومت به سمجهندي هوندي ۽ عوام به سمجهي ٿو. ان ڪري سرڪار بهادر کي پنهنجي فيصلي تي پير ڄمائي بيهڻ گرجي ۽ ان حڪم نامي تي عمل ڪري ڏيکارڻ گهرجي. سنڌ جا ماڻهو اهڙن مسئلن تي جيڪي سنڌ ۽ سنڌ جي ماڻهن جي وجود سان ڳنڍيل آهن، حڪومت کي اڪيلو نه ڇڏيندا.
اعلان ڪيو ويو آهي ته غير ملڪين جا غير قانوني طور داخل ڪيل ووٽ خارج ڪرائڻ لاءِ اليڪشن ڪميشن کي ريفرنس موڪليا ويندا. توقع ڪجي ٿي ته حڪومت اهڙا ريفرنس موڪلڻ ۾ دير نه ڪئي وئي هوندي ۽ ريفرنس رواني ٿي چڪا هوندا يا اماڻڻ جي آخري مرحلي ۾ هوندا. وڏي وزير هڪ اعليٰ سطحي اجلاس ۾ اهي حڪم ڏنا آهن، جنهن ۾ چيف سيڪريٽري، هوم سيڪريٽري، ڪراچيءَ جو ڪمشنر، ڪچي آبادي واري اختياريءَ جو ڊائريڪٽر جنرل ۽ لينڊ يوٽيلائيزيشن وارا ڪامورا موجود هئا. انهن کان وڏا ڪامورا سنڌ ۾ ڪو نه آهن. اهي چاهين ته وڏي وزير جي حڪم کي ايئن تارپيڊو ڪري ڇڏين، جيئن دشمن جي آبدوز کي ڪيو ويندو آهي.
وڏي وزير ته حڪم ڏئي ڇڏيا، هاڻي ڏسڻو اهو آهي ته ڪامورا ڇا ٿا ڪن؟ ڪيئن ٿا اينٽي سب ميرين ميزائيل هلائين ۽ ڪيئن ٿو وڏو وزير پنهنجي حڪم نامي کي بچائي! وڏو وزير سمجهي يا نه سمجهي، عوام ضرور سمجهي ٿو ته پنهنجي حڪم تي عمل ڪرائڻ وڏي وزيرلاءِ هڪ وڏو چئلينج آهي.
سنڌ حڪومت کي گذارش آهي ته سنڌ جي عوام جو مطالبو فقط غير ملڪين تائين محدود نه آهي، اها سڄي خدا جي خلق جنهن سنڌ کي دبئي سمجهي ڪشمير، پنجاب ۽ سرحد کان سنڌ ڏانهن لڏ تي زور رکيو آهي، ان کي به روڪڻ جي ضرورت آهي. ٿيڻ ته ايئن گهرجي ته ان ڏس ۾ ماضيءَ جو سڄو رڪارڊ پڌرو ڪجي پر جيڪڏهن اهو ممڪن نه آهي ته گهٽ ۾ گهٽ ايترو ڪجي ته وڌيڪ آمد کي روڪجي. سنڌ جي سياسي مفادن تي فقط غير ملڪي ئي اثر انداز ڪو نه ٿا ٿين. پنهنجي ئي ملڪ جي ٻين صوبن جي خلق به اثر انداز ٿئي ٿي جيترو ٿي ويو سو ٿي ويو پر اڳتي لاءِ اکيون پٽيو!