ٻنڌڙي

ٻنڌڙي:

هڪ گبر بند نئه ٻنڌڙي تي آهي، جيڪا جهانگارن جي ڀرسان لنگهي منڇر ڍنڍ ۾ ڇوڙ ڪري ٿي. گبر بند کي ’ٻنڌڙي‘ طور سڃاتو وڃي ٿو، جيڪو بڊي جبل جي هڪ شاخ ۽ لنڊي جبل جي وچ ۾ تعمير ڪيل آهي. هي گبر بند اٽڪل هڪ ميل ڊگهو، پاڙ وٽ 35 فٽ ويڪرو ۽ 15 فٽ اوچو آهي. مٿاهين ويڪر 6 فٽ اٿس. صحرائي صاحب بند جي ماپ وٺڻ کان پوءِ اڏاوت بابت لکي ٿو ته، ”اها ٻنڌ کانچن جي صورت ۾ ٺهيل آهي ۽ کانچا مٿي چوٽيءَ تائين پٿرن سان جڙيل آهن. کانچن کي مٽي ۽ ننڍن ننڍن پٿرن سان ڀريو ويو آهي. کانچا مختلف ماپن جا آهن، ننڍي ۾ ننڍو کانچو 6 فٽ ۽ وڏي ۾ وڏو کانچو 10 فٽ آهي.“ وڌيڪ لکي ٿو ته: ”ٻنڌ جي چوٽيءَ کي پاڻيءَ جي لهرن ۽ هوائن جي کاڌ کان بچائڻ لاءِ پٿرن جون ٽي ڪانسون آهن، جيڪي هڪ ٻئي جي مٿان ٺهيل آهن. مٿين ڪانس به ويڪر ۾ ڇهن فٽن کان ويڪري آهي. وچين ڪانس 10 فٽ ۽ هيٺيئن ڪانس 15 فٽ ويڪري آهي. ٻنڌ مٽي، وارِي ۽ پٿراٽي سان ٺهيل آهي.“ هي گبر بند وچان وچان ڀڄي پيو آهي، البت گبربند جي اڏاوت يعني کانچن ۽ پٿرن جي جڙاوت ٻين بندن کان مختلف آهي.