ٻولين جي گهوڙ ڊوڙ ۽ سنڌي ميڊيم

ڻ گهرن ٿا، سائين منھنجا!ٰ پرائمري ۾ بہ پڙهڻ گهرن ٿا، پڙهايو تہ سهي. پر پھرين سنڌي پڙهايو جيڪا هنن جي امڙ جي ٻولي آهي ۽ مهرباني ڪري اهو بہ ٻڌايو تہ توهان سنڌي ٻارن کي هڪ وقت ۾ گهڻيون ٻوليون پڙهائيندا؟ سنڌي مادري ٻولي آهي، اڙدو رابطي جي ٻولي آهي، انگريزي رابطي ۽ علم جي عالمي ٻولي آهي. ڇا سڀاڻي پاڪستان جي ويٽو پاور قوم جي ٻولي ۽ پرهينءِ اسلامي امه جي عربي بہ پڙهائيندا؟ پنھنجن ”آئڊياز“ کي ڪٿي تہ بريڪ هڻو!

ڳالھہ سڌي سنئين آهي ۽ مسئلي جو حل اکين جي اڳيان آهي، جنھن جذبي سان سنڌي ماڻهن کي انگريزي پڙهائڻ ٿا گهرو، اهڙي ئي جذبي سان هڪ فعال ادارو قائم ڪيو، جيڪو جديد علمن کي مستقل طور پاڪستان جي قومي ٻولين ۾ ترجمو ڪندو رهي. سڄي قوم جي هر فرد کي هن جي مادري ٻوليءَ ۾ دنيا جو علم ڏيو جيئن انگريز، فرينچ، چيني، جاپاني ۽ عرب ڪري رهيا آهن. انگريزي گهوڙن جون نرسريون ڀلي قائم ڪريو پر مهرباني ڪري سنڌيءَ کي بہ اڳتي وڌڻ ۾ مدد ڪريو.

اهو سچ آهي تہ سنڌي دنيا جي قديم ۽ شاهوڪار ٻولين مان هڪ آهي پر هي جديد زمانو آهي، سنڌيءَ ۾ نئين دور جي لغت، محاورن، علمن ۽ تجربن کي بہ شامل ڪريو، نہ تہ سنڌي ٻولي ختم ٿي ويندي. فقط اهي ٻوليون باقي رهنديون آهن، جن ۾ جديد علمن جو ذخيرو داخل ٿيندو رهي. ٻوليون نيرين ڍنڍن وانگر هونديون آهن، جيڪڏهن انھن ۾ تازن علمن جو پاڻي شامل ٿيندو رهندو تہ اهي دائم قائم رهنديون آهن، پر جيڪڏهن نئون علم، نئون پاڻي پوڻ بند ٿي ويو تہ اهي ڌپاريون ٿي هڪ ڏينھن سڪي وينديون آهن.