ٻِلي، بوئيجا ٽرائيوڪوناٽا

ٻِلي، بوئيجا ٽرائيوڪوناٽا Common Indian Cat Snake / Boiga trigonata /

گجراتيءَ ۾ هن بلا کي ’ڪَوڙيو سانپ‘ چون ٿا. هن مهل تائين وڏي ۾ وڏي بلا 965 ملي ميٽر ريڪارڊ ڪئي وئي آهي. مادي نَر جي ڀيٽ ۾ وڏي ٿيندي آهي جيڪا 1170 ملي ميٽر ريڪارڊ ٿي آهي. هي ننڍڙيون بلائون وڻن تي رهنديون آهن، رات باش ٿين ٿيون. پکي، آنا، ڪِرڙيون ۽ جيت جڻا انهن جي خوراڪ آهي. وڻن تي ٽارين ۾ پنن اندر لڪي ويهنديون آهن. انهن جو رنگ وڻن جي ٽارين جهڙو ڀورو ۽ چِٽن وارو ٿئي ٿو جنهن ڪري اکين کان اوجهل رهن ٿيون. هي بلائون خطري وقت زوردار حملو ڪنديون آهن ۽ بلڪل غير زهريليون آهن.
بوئيجا ٽرائيگوناٽا جو جسم هلڪو ڀورو پاسن کان هلڪو مِٽيائون ٿي ويندو آهي. پُٺيءَ طرف 40 کان 50 هڪ ٻئي سان ڳنڍيل ڪنارين واريون آڏيون ترڇيون پٽيون هونديون اٿس، جيڪي جسم جي اڳئين حصي ۾ نمايان ۽ پوئتي گهٽ نمايان ٿينديون وڃن ٿيون. پيٽ مِٽيائون اڇو هوندو اٿس، جنهن تي گـهري ڀوري ۽ ڪاري رنگ جا ننڍا چِٽ ٿين ٿا. مٿي تي به ساڳي نموني جا نشان اٿس.
بوئيجا بلائن جو مٿو ويڪرو، ۽ ڳچيءَ کان ڪافي نمايان ٿئي ٿو. وڏيون اکيون، اک جي پُتلي عمودي ۽ سنهي هئڻ ڪري ٻليءَ جي اکين جهڙي لڳندي آهي. ان ئي نسبت سان هن نانگ کي Cat Snake چوندا آهن. ان جو جسم ٻنهي پاسن کان چپٿرو ٿئي ٿو، ڇلر مستطيل جهڙا ڊگهڙا، پٺيءَ تي ڇلرن جي قطار وڏن ڇلرن تي مشمل آهي. اهي 3 کان 11 آنا مئي کان جُون ۾ وڻن جي پورن ۾ ڏينديون آهن. جون ۽ جولاءِ ۾ ٻچا ڦٽي ايندا آهن.
بوئيجا ٽرائيگوناٽا بنگلا ديش کان سري لنڪا هندستان پاڪستان ۽ ڪيسپين سمنڊ تائين پکڙيل آهي.