ابڙو اڪيڊمي Abro Academy
2020-11-06
داخلا نمبر 1248
عنوان ٽيليفون کاتي مان نيڪاليون ۽ نيون ڀرتيون!
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1155
داخلا جو حوالو:
هن داخلا جون تصويرون نه مليون
ٽيليفون کاتي مان نيڪاليون ۽ نيون ڀرتيون!
ڪراچيءَ جي فون کاتي ۾ ڪجهه سالن کان ڪم ڪندڙ 60 ڪچن ملازمن کي بنا ڪنهن قانوني نوٽيس يا ٽرمينيشن آرڊر جي زباني ڪلامي نوڪريءَ کان جواب ڏنو ويو آهي، چئن مهينن کان سندن پگهارون پڻ روڪيون ويون آهن، جنهن سان سندن هيلوڪي عيد پڻ رمضان جو روزو ٿي وئي. گولين ۽ بمن جي شهر ۾ پنهنجن ٻچن لاءِ ماني ڳڀو ڪمائڻ لاءِ نڪرڻ به ڪنهن ڪارنامي کان گهٽ ڪونهي. هڪ طرف نوڪرين جي کوٽ ٻئي پاسي ايڊهاڪ ئي سهي نوڪريءَ تي لڳل ملازمن کي ڊي اي فونز بن قاسم نامعلوم سببن جي بنياد تي محض زباني حڪم سان ٻچن جي پيٽ گذر ۽ ورٽي ٽڪر لاءِ نڪرندڙ هنن ڪچن ملازمن کي گهر ويهڻ جا حڪم ڏئي ڊيوٽي تي وٺڻ کان انڪار ڪري ڇڏي ٿو. وزيرن، مشيرن، آفيسرن ۽ اخبارن آڏو پڪارن، ايلازن ۽ احتجاجن کي چوٿون مهينو لنگهڻ جي باوجود فون کاتي جي هنن 60 ملازمن کي نه بحال ڪيو ويو آهي ۽ نه ئي هنن جو رهيل پگهارون هنن کي ڏنيون ويون آهن. ملڪ جي وزيراعظم تي بي شڪ عوامي آهي پر لڳي ٿو ته عوام جو ڪو به ڌڻي سائين ڪو نه آهي!
کاتي جي ملازمن جي ايڊهاڪ ايڪشن ڪميٽيءَ جو چوڻ آهي ته ڊي اي فونز بن قاسم ملازمن جي پگهار جا 4 لک 80 هزار رپيا ٻين آفيسرن سان ملي ڀڳت ڪري هڙپ ڪرڻ چاهي ٿو ۽ هو ڪجهه ڏينهن ۾ پرڏيهه روانو ٿي ويندو، جنهن بعد هنن جو مسئلو وڌيڪ اينگهجي ويندو. ايڪشن ڪميٽي چواڻي وزيراعظم بينظير ڀٽو جي هدايتن تي قانون واري وفاقي وزير اين ڊي خان پاران ڪارڪنن جون رهيل پگهارون ادا ڪرڻ ۽ ڪچن ملازمن کي پڪو ڪرڻ جي حڪم باوجود اهي ڪامورا ٻوڙين فوجن وانگر بضد آهن. حيرت ان ڳالهه تي آهي ته ايڊهاڪ ملازمن کي نوڪرين تان لاهي مٿان نيون ڀرتيون ڪيون ويون آهن. يعني، پگهارن جي کوٽ وارو سوال به دليل وڃائي چڪو آهي.
پاڪستان جي قيام کان وٺي هيل تائين جيڪڏهن ڪنهن عوامي حڪومت جو عوام جي ڀلي لاءِ مرتب ڪيل پروگرام ناڪام ويو آهي ته ان جي پويان اڪثر ڪامورا شاهيءَ جا هٿ نظر آيا آهن. هر پارٽي حڪومت ۾ اچڻ کان اڳ بيروزگاريءَ جي خاتمي جو راڳ آلاپي، غربت کي ڏيهه مان تڙڻ جون بينون وڄائي ٿي ۽ پوءِ عوام لاءِ درد ڏيکاري گليسرين جا ڳوڙها ڳاڙي سدائين اقتدار سلامت رکڻ جي ڪوشش ڪندي رهي آهي.
ٽيليفون کاتي جي ڪچن ۽ ننڍن ملازمن جي پگهار جهرا معمولي مسئلا به حل نه ٿين ته پوءِ حڪومت ڇاجي؟ ڪامورا يقينن ڪامياب ٿيا آهن جو سندن بهتر حڪمت عملي سبب پنجاهه سالن جي پوڙهي پاڪستان جي ڏيل مان غربت تڙڻ بدران ڏند ڪٿائي جعفر جنڙي وانگر ان جي بدن ۾ واسو ڪري وئي اهي ۽ بيروزگاري وڻ ويڙهيءَ وانگر شاخون ڦهلائيندي وئي آهي. امير امير تر ۽ غريب وڌيڪ غريب ٿيندو ويو آهي. شايد هي به ساڳيو ئي تسلسل آهي جو موجوده جمهوري حڪومت پاران بيروزگاري جي خاتمي لاءِ وس ڪرڻ جي باوجود وڌيڪ ماڻهن کي ته روزگار نه ٿو ملي پر جيڪي روزگار سان لڳل آهن انهن کي به ڪامورا شاهي پنهنجي مرضيءَ سان جڏهن چاهي گهر ويهاري ڇڏي ٿي.
ڇا اهو موجوده حڪومت جو ڪم نه آهي ته اها بن قاسم جي فون ملازمن جي مسئلي سميت سڄي ملڪ ۾ مختلف ادارن ۾ ايڊهاڪ تي ڪم ڪندڙن جي مسئلن ۽ مستقبل لاءِ سنجيده ڪوشش ڪري ۽ ايڊهاڪ تي ڪم ڪندڙ کي پڪو ڪري انهن کي آئيندي جي ضمانت ڏئي. ڇا اهو حڪومت لاءِ ڏکيو ڪم آهي ته اها مختلف ادارن ۾ ڪارڪن ۽ عوام دشمن ماڻهن تي ڪرڙي نظر رکي؟ حڪومت کي اهو نه وسارڻ گهرجي ته اها هڪ عوامي حڪومت آهي، عوام مان آهي ۽ عوام ڏانهن موٽڻي آهي.