ٽِيٽو ننڍو

15 سينٽِي ميٽر جسامت جو هي ننڍڙو ٽيٽو لڳ ڀڳ ننڍي ڳاني ٽيٽي جهڙو ئي آهي پر ٻه فرق نمايان آهن، هڪ ته هن کي ڳانو نه آهي. ٻيو ته هن جي مٿي تي ڪاري ليڪ ته آهي پر مٿي جو رنگ هلڪو اکروٽي ٿئي ٿو. اکين کان ڪياڙيءَ تائين ڪجل وانگر ڪارو پٽو به ٿئي ٿو، جيڪو ماديءَ کي نٿو ٿئي. ان جي پٺي پٿريلي ناسي ۽ هيٺيون پيٽ وارو حصو اڇو ٿئي ٿو. هي پکي سياري ۾ گهڻو ڏسبو آهي، ٻين ٽيٽن سان به ڏسبو آهي. تمام ڦڙت آهي. ٽنگون ننڍيون اٿس پر گپ ۾ به تکو آهي ان جي ٻولي چٽِي، ٻِٽي ۽ تکي آهي.