ابڙو اڪيڊمي Abro Academy
2020-11-05
داخلا نمبر 1050
عنوان پر ”اونداهي ۾ فرار“ جو ڇا ٿيندو؟
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1127
داخلا جو حوالو:
هن داخلا جون تصويرون نه مليون
پر ”اونداهي ۾ فرار“ جو ڇا ٿيندو؟
ڳرا هٿيار رکڻ ته اڳ به جائز ڪو نه هو، هاڻي ان ڏوهه کي نئين سر ڏوهه قرار ڏنو ويو آهي ته ان سان ڪو خاص فرق نٿو پوي. ڇا هن کان اڳ هڪ خاص بور کان وڌيڪ واري بندوق رکڻ جائز هو؟ ڇا ڪنهن فرد کي اجازت هئي ته هو ڀلي توپ، دستي بم، راڪيٽ لانچر، ميزائل، مشين گن وغيره رکي؟ ڇا هن کان اڳ ۾ اهي گاڏيون ضبط نه ڪيون وينديون هيون جن کي هٿيارن جي سمگلنگ ۾ استعمال ڪيو ٿي ويو؟ اهي سڀ ڳالهيون موجود هيون، هاڻي اضافي ڳالهه اها ٿي آهي ته ڳرا هٿيار رکڻ ۽ وڪڻڻ تي موت يا عمر قيد جي سزا ملندي.
سزا تڏهن ملندي آهي ته جڏهن ڏوهاري گرفتار ٿيندو آهي. اسان اهو ته ڏٺو آهي ته ننڍ هٿيار رکندڙ ”ننڍا ماڻهو“ 13 ڊي ۾ چالان ٿي جيل پهچندا آهن جن جي سزا شايد ٽي مهينا آهن. پر اهي ڪڏهن به نه ٻڌو ويو ته فلاڻي يا فلاڻي غير قانوني هٿياربند گروپ جي فلاڻي يا فلاڻي شخص کي غير قانوني ڪلاشنڪوف رکڻ جي ڏوهه ۾ سزا ٻڌائي وئي هجي. لڳ ڀڳ هر ان خبر ۾، جيڪا هٿيارن ۽ هيروئن جي ٽرڪ جهلجڻ بابت هوندي آهي، ان ٽرڪ جو ڊرائيور ”اونداهيءَ ۾ فرار“ ٿي ويندو آهي. اها ”اونداهي“ رات جي گهٽ، قانون جي محافظن جي وڌيڪ هوندي آهي.
ڳرن هٿيارن جي سمگلنگ ۽ اهي هٿيار رکڻ تي سخت کان سخت سزا جو قانون سٺو آهي، شرط اهي آهن ته انهن تي عمل لاءِ سمگلرن ۽ دهشتگردن کي ”اونداهيءَ ۾ ڀڄڻ“ نه ڏنو وڃي ۽ ايجنسين ۽ پوليس کي اهو موقعو نه ڏنو وڃي ته اهي ان قانون کي ڪنهن بيگناهه کي ڦاسائڻ جو سامان ڪري ڇڏين. جڏهن سزائون سخت کان سخت رکيون وڃن ٿيون، تڏهن قانون جي حفاظت لاءِ گهڻي کان گهڻو چوڪس رهڻو پوندو آهي. ڪٿي ايئن نه ٿي ته نئون قانون پوليس ۽ ايجنسين جي هٿ ۾ رانڪديو بڻجي وڃي ۽ خلق هڪ اهڙي آزار ۾ پئجي وڃي جو حڪومت کي پٽون ۽ پاراتا ڏيڻ لڳي.
هاڻي جڏهن قانون ٺهي چڪو آهي ۽ ڏوهه تي سزائون مقرر ڪري اخبارن ۾ ان جي تشهير ڪئي وئي آهي ته ماڻهو توقع رکندا ته ان جا جلد ۽ بهتر نتيجا نڪرن. دهشتگردي جو جواب نرميءَ سان ڏيڻ جون ڪوششون هر هڪ مرحلي تي ناڪام ويون آهن، تنهنڪري ڪراچيءَ مان هڪ هڪ غير قانوني هٿيار نڪرڻ ضروري آهي. اهو ڪم جيترو جلد ۽ احتياط سان ٿئي، شهرين جي حق ۾ اوترو ئي بهتر آهي. ڪاش ڪنهن کي ”اونداهيءَ ۾ ڀڄڻ“ جو موقعو اڄ کانپوءِ نه ڏنو وڃي!