پيپلز پارٽي: نئين جوڻ وٺڻ يا سياسي موت جو مرحلو؟

/>
هاڻي، اسان عدالت ۽ قانون جي پيچيدگين کي عدالت جي چوديواري اندر ڇڏي ڳوٺ ڳوٺ ۽ شهر شهر جو واءُ سواءُ وٺون تہ بھتر! هونئن تہ جڏهن 1979ع ۾ مسٽر ڀٽي کي ڦاسي ڏني وئي، تڏهن بہ ڌرتي ڪو نہ ڌڏي هئي، احتجاج ٿيا هئا، ماڻهن پاڻ کي باهيون ڏيئي ساڙيو هو ۽ پوءِ ڪجھہ سالن تائين هڪ اهڙي وڏي ماٺ ڇائنجي وئي هئي جھڙي ڪڏهن هيروشيما ۽ ناگاساڪيءَ تي ڇائنجي هئي. هاڻي بہ سنڌ ’سراپا“ احتجاج بڻجي وئي آهي. جيڪب آباد، خيرپور، رتوديرو، ڪنڌڪوٽ ۽ حيدرآباد ۾ جلوس ڪڍي پتلا ساڙيا ويا. قومي شاهراھہ جي بلاڪ ٿيڻ جي خبر بہ آئي آهي ۽ اڄ ڦيٿا روڪ هڙتال جو سڏ بہ ڏنو ويو. ڪنھن ڌر ايئن بہ چيو تہ ‘بينظير کي نااهل قرار ڏيڻ جو فيصلو سنڌ کي پاڪستان کان ڌار ۽ اجنبيت جو احساس ڏيارڻ وارو عمل آهي.

سنڌ جي ماڻهن کي تہ ڇڏي ڏيو، پنجاب وارا سنڌ جي عوام کي ڪڏهن بہ سمجهي نہ سگهندا پر پاڪستان جو اڳوڻو صدر فاروق لغاري جنھن محترمہ جي حڪومت برطرف ڪئي هئي، ڇا ٿو چوي؟ هو چوي ٿو، ’بينظير لاءِ آيل فيصلو نواز شريف جي نااهليءَ جو ڪارڻ بڻيو.“ ممڪن آهي تہ فاروق لغاري ميان صاحب لاءِ بہ ساڳئي سزا تجويز ڪرڻ واري خواهش ظاهر ڪندو هجي پر هڪ حقيقت واضح آهي تہ محترمہ کي هاڻي سياسي طرح تمام BOLD ۽ ٺوس فيصلا ڪرڻا پوندا. هي سزا کائڻ يا سزا کان بچڻ جو مسئلو ڪو نہ آهي. هي بينظير ۽ سندس پارٽي لاءِ سياسي طور دفن ٿيڻ يا سياسي طور نئين جنم (Political Re Incarnation) وٺڻ جو آخري موقعو آهي. عدالتي جنگ پنھنجي جاءِ تي پر هن کي هڪ ئي وقت پونم ۽ پائي سان مضبوط اتحاد يا COMPROMISING POINTS تي اچڻو پوندو. وفاق پرستي ۽ قومپرستي جي غير ضروري اصطلاحن جي ڄار مان نڪري حقيقي عوامي ۽ قومي جمهوريت جي روح موجب سياست ڪرڻي پوندي.

عوام کي هڪ ئي وقت حقيقي عوامي جمهوريت، قومي خودمختياري ۽اختيارن جي عدم مرڪزيت گهرجي. معاشي آجپو گهرجي ۽ اوڙي پاڙي سان دوستيون گهرجن. لاهور، اسلام آباد ۽ راولپنڊيءَ وارا چاهي جيئن بہ سوچين، پشاور، ڪوئيٽا، ڪراچي، ملتان ۽ حيدرآباد وارا شهري سياسي ۽ ايٽمي ڌماڪن تي خوش نہ آهن. غوري ۽ شاهين عظمتن جا معيار ڪنھن Martial race ۽ پيش قدمي ڪندڙ ڌرين ۽ سوچ لاءِ هوندا، عوام کي تہ فقط عزت سان جيئڻ جو حق کپي، جيڪو بہ ڏئي!