ابڙو اڪيڊمي Abro Academy
2020-11-05
داخلا نمبر 1023
عنوان پيپلز پارٽيءَ جو وڻ ۽ وڻ ويڙهيون
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1405
داخلا جو حوالو:
هن داخلا جون تصويرون نه مليون
4 سيپٽمبر 1995ع
پيپلز پارٽيءَ جو وڻ ۽ وڻ ويڙهيون
ميرن کي گهر مان لڳي ۽ ٽيپوءَ جو ڪنڌ پنهنجن جي بي وفائيءَ سبب وڍجي ويو. پيپلز پارٽيءَ جي سر جي پويان نواز شريف ۽ الطاف حسين ضرور آهن، پر لڳي ٿو ته جيالا اڳ ڪڍي ويندا.
عمرڪوٽ وارن قديم آثارن جي پلاٽ تي پيپلز پارٽيءَ جي عهديدار خاتون جي ڏاڍ مڙسيءَ سان اڏاوت جو ڪم جاري هجڻ جون خبرون اخبارن ۾ موجود آهن ۽ سندس چوڻ آهي ته اهو پلاٽ وڏي وزير جي سفارش تي کيس الاٽ ٿيو آهي. جيتوڻيڪ وڏي وزير ان پلاٽ جي حوالي سان مثبت بيان به ڏنا آهن، پر اهي غالباً نظر انداز ڪيا ويا يا اهي محض ”بيان“ هئا. لياريءَ ۾ غريب ماڻهن لاءِ اڏيل 500 گهر اقبال حيدر ۽ اڇي ميمڻ جي زالن ۽ پنجاب جي آرٽسٽ روبي نيازيءَ کي الاٽ ٿيڻ جا اطلاع آهن. اهي گهر جن ماڻهن کي مليا آهن، اهي پيپلز پارٽيءَ سان لاڳاپيل سنڌ جي شهري ۽ خوشحالي علائقن ۽ پنجاب سان تعلق رکن ٿا. ٻيو ته ٺهيو ڊفينس ۽ گلشن اقبال جي ”غريبن“ کي به نه وساريو ويو. ان رٿا تي ڪروڙين رپيا خرچ ٿيا هئا.
وڏن ماڻهن هاڪس بي واري پاسي انهن گهرن ۾ ايئرڪنڊيشنر هڻي، انهن کي پڪنڪ لاءِ استعمال ڪرڻ به شروع ڪري ڇڏيو آهي. انهن گهرن مان 448 گهرن جا الاٽمينٽ آرڊر وزيراعظم جي هٿن سان ورهايا ويا، پر هن کي ڪهڙي خبر ته ڪامورا اندارن ئي اندران ڪهڙي راند کيڏي ويا آهن! چيو وڃي ٿو ته ڪامورن اڪثر اهڙن بااثر ماڻهن جا نالا لسٽ ۾ شامل ڪري ڇڏيا جن جو لياريءَ سان تعلق ئي ڪو نه هو. هي معاملو اڳتي وڌي اسيمبليءَ تائين پهتو، اتي سوال به اٿاريو ويو ته لسٽ به پيش ڪئي وئي. پوءِ ڳالهه آئي وئي ٿي وئي ۽ حقدار حقن لا واجهائيندا ئي رهجي ويا.
ٽيون واقعو ”خيرپور ناٿن شاهه ۾ جيالا اسٽيٽ“ جي نالي سان اخبارن ۾ رپورٽ ٿيو آهي. خبر چوي ٿي ته ڳوٺ ٻيلي پتڻ جي هڪ رهواسيءَ جي 40 ايڪڙ زمين تي جيالن قبضو ڪري ورتو آهي. ڪيس سول ڪورٽ ۾ داخل ٿيو آهي، پر مالڪن کي ڪيس تان هٿ کڻڻ جون ڌمڪيون پيون ملن. زين العابدين جويو نالي هڪ شخص اخبارن کي ٻڌايو ته ٻن جيالن جان محمد ۽ غلام رسول بروهيءَ جن کي هڪ صوبائي وزير جي پٺڀرائي حاصل آهي، سندس چاليهن ايڪڙن تي نه رڳو قبضو ڪيو، پر کيس قتل جي ڌمڪي به ڏني وئي ۽ هڪ ڪوڙي ڪيس ۾ ٻه ٽي ڏينهن گرفتار ڪرائي پوليس هٿان تشدد به ڪرايو ويو.
هي ڪي ٻه چار واقعا ته ڪو نه آهن جيڪي پريس ۾ رپورٽ ٿيا. انهن کانسواءِ به بيشمار واقعا آهن جيڪي ڳوٺ ڳوٺ ۽ شهر شهر ۾ ٻڌجن ٿا، پر ماڻهو ”مِٺي به ماٺ ۽ مُٺي به ماٺ“ ڪيو ويٺا آهن. پيپلز پارٽيءَ سان وابستگي ڪنهن به قسم جي ڏاڍائي ڪرڻ جو سرڪاري لائسنس ته نه آهي. تازو پيپلز پارٽيءَ جي هڪ ڪارڪن جو خط اخبار ۾ ڇپيو ته ”ڀائرو! اهي جيالا نه آهن!“ خط لکندڙ ڪارڪن صفائي پيش ڪرڻ گهري هئي ته اهي ڪي ٻيون بلائون آهن جيڪي پيپلز پارٽيءَ کي وڪوڙي ويون آهن، جڏهن ته اصل ڪارڪن اڃا به ڏکيا بکيا ۽ بيروزگار پيا ڦرن، جن کي ڪو پڇي ئي ڪو نه ٿو.
اصل ڳالهه ڪهڙي به هجي. اهي جيالا آهن يا ڪي ٻيون بلائون آهن، ٻنهي صورتن ۾ نالو ته پيپلز پارٽيءَ جي حڪومت جو خراب ٿي رهيو آهي. پارٽيءَ جي مخلص ڪارڪن جي خط تي اعتبار نه ڪرڻ واري ڪا به ڳالهه نه آهي. اهڙا هزارين سچا ڪارڪن دربدر ڦري رهيا آهن پر اهو به غلط نه آهي ته هن وقت حڪومت کي بيشمار مفاد پرست وڪوڙي ويا آهن، جن ڳوٺ ڳوٺ ۽ شهر شهر ۾ پارٽيءَ جي ساک کي ڏاڍا خوفناڪ ڌڪ هنيا آهن. سچي ڳالهه ته اها آهي ته اهي مفاد پرست پيپلز پارٽيءَ جو نالو استعمال ڪري پارٽيءَ جي ووٽرن کي بد ظن ڪري پارٽيءَ جو ووٽ بينڪ تيزي سان ڪيرائي رهيا آهن.
ڳالهه پيپلز پارٽيءَ کي ڪو نه وڻندي پر جيڪڏهن پارٽي قيادت پنهنجي اطمينان لاءِ ماٺ ميٺ ۾ اعتماد جوڳن ماڻهن هٿان سروي ڪرائي ته سڀ خبر پئجي ويندي ته ڪهڙي صوبائي ۽ قومي اسيمبلي ميمبر سڄي تر ۾ ڏهڪاءُ قائم ڪري رکيو آهي ۽ ڪهڙن ڪهڙن شراب جي گتن، جيڪي ”ورهايا“ ويا آهن، چادرن جي حرمت لتاڙي آهي. ڪميشن ۽ پلاٽن جو ڪاروبار ڪيئن ۽ ڪير هلائي رهيو آهي. پارٽيءَ جي قيادت کي سچ پچ حيرت ٿيندي ته بيشمار ٽولا ننڍيون مافيائون بڻجي ويا آهن.
پپيلز پارٽيءَ جي قيادت کي ترت ئي پنهنجي وجود جي وڻ کي وڪوڙيل مفادن ڏانهن نهارڻ گهرجي، جيڪي وڻ ويڙهيءَ وانگر کيس ورائي ويون آهن. ان کي پنهنجيون اهي پاڙون به نهارڻ گهرجن جن تي ڪي مفاد ڪهاڙا بڻجي ڪڙڪي رهيا آهن، جن جي آبياري ڏکين وقتن ۾ سنڌ جي ٻهراڙي ۽ شهرن ۾ ويٺل هيٺئين ۽ وچولي طبقي ڪئي ۽ جڏهن جڏهن ضرورت پئي، پنهنجي رت جو ريج به ڏنو. ضرورت آهي ته پيپلز پارٽي،پارٽيءَ ۾ اندر هڪ سيل کولي انهن ماڻهن جون شڪايتون ٻڌي جن سان جيالن يا بلائن پيپلز پارٽيءَ جي نالن ۾ جٺيون ڪيون آهن، عوامي ۽ سرڪاري ملڪيتن کي ٻنهي هٿن سان ميڙي پنهنجو ڪيو آهي يا ڪي ٻيون بد عنوانيون ڪيون آهن. حڪومت تعميري تنقيد ڪرڻ جون صلاحون ته ڏيندي رهندي آهي، خدا ڪري ته اها تعميري تنقيد ٻڌڻ جو حوصلو به رکي ۽ عوام جي ڏکن جو ازالو ڪرڻ لاءِ اڳتي به وڌي.