ابڙو اڪيڊمي Abro Academy
2020-11-05
داخلا نمبر 1081
عنوان پي ٽي سي ريفرنڊم
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1218
داخلا جو حوالو:
هن داخلا جون تصويرون نه مليون
پي ٽي سي ريفرنڊم
پاڪستان ٽيلي ڪميونيڪيشن ڪارپوريسن جي ريفرينڊم ۾ مسلم ليگ جي حمايتي ايمپلائيز يونٽيءَانڪري ڪو نه کٽيو آهي ته پيپلز پارٽيءَ جي حمايتي لائن اسٽاف يونين گهٽ تياري ڪئي هئي. ”يونٽيِءَ“ 22328 ووٽ کنيا ۽ ”يونين“ 16351 ووٽ کنيا. 38 هزارن کان وڌيڪ ووٽرن جي اظهار راءِ ۾ 6 هزارن کان گهٽ ووٽن جو فرق گهڻو نه سهي پر واضح فرق ضرور آهي. يونٽيءَ جي ڪاميابيءَ تي پيپلز پارٽيءَ جون اکيون ان ڪري به پٽجڻ گهرجن ته مسلم ليگ هڪ يونين جي ريفرينڊم ذريعي پنهنجي سياسي قوت جمهوري طريقي سان ثابت ڪئي آهي.
اڳوڻو وزيرسيد غوث علي شاهه جيڪو مسلم ليگ (ن) سنڌ جو صوبائي صدر به آهي ڀلي ته ڪنهن ٻئي حوالي سان سنڌ جي هاڻوڪي وڏي وزير کي چونڊن لاءِ للڪارڻ مهل ايئن چوي ته ”سيد عبدالله ڪبوتر وانگر حقيقتن کان اکيون ٻوٽي ويٺو آهي،“ مسلم ليگ جي ذهن ۾ پي ٽي سي ريفرنڊم ۾ ڪاميابيءَ جو نشو موجود آهي. پي ٽي سي بهرحال پاڪستان جي سياست جو ڪو ”ٽيسٽ ڪيس“ نه آهي، ڇاڪاڻ ته ان ۾ اها خلق آهي ئي ڪو نه جنهن ۾ پاڪستان جي قومن ۽ صوبائي وحدتن کي ٺيڪ طرح نمائندگي به ڪو نه ڏني وئي آهي. ڪارپوريشن ۾ ڀرتين جي تفصيلي انگن اکرن ۾ وڃڻ جي ضرورت آهي. ٿورو ئي تفصيل سان چڪاس ڪرڻ مان پتو پوندو ته پي ٽي سي اصل ۾ پاڪستان جي صنعتي مرڪزن جي نمائندگي ڪندڙ ادارو آهي. هڪڙا ڪارڪن ڪراچيءَ جي ان آباديءَ سان تعلق رکن ٿا جن جون همدرديون ايم ڪيو ايم سان آهن ۽ ٻيا پنجاب جي انهن صنعتي علائقن سان تعلق رکن ٿا جتي نواز شريف پنجابيت کي زور وٺايو آهي.
ٻين لفظن ۾ پي ٽي سي ۾ ٿيل ريفرينڊم جا نتيجا اصل ۾ اتر پنجاب ۽ ڪراچيءَ جي سياسي اتحاد جي عڪاسي ڪن ٿا. پاڪستان انهن ٻين علائقن کان گهڻو وڏو آهي، ان ڪري اهو سمجهڻ ته ڪارپوريشن ۾ مسلم ليگ جي ڪاميابي پاڪستاني عوام جي حتمي سوچ جو عڪس آهي، پاڻ کي غلط فهميءَ ۾ رکڻ جي ڳالهه ٿيندي. پيپلز پارٽيءَ لاءِ 16 هزارن کان مٿي ووٽ پوڻ خود هڪ حيرت جي ڳالهه آهي، جنهن مان گهٽ ۾ گهٽ اهو واضح ٿئي ٿو ته ڪراچيءَ ۽ اتر پنجاب ۾ ايم ڪيو ايم ۽ مسلم ليگ جي گڏيل اتحاد کي ”واڪ اوور“ پوزيشن حاصل نه آهي ۽ پيپلز پارٽي صنعتي شهرن ۽ علائقن ۾ به مخالف ڌر لاءِ هڪ وڏو چئلينج آهي. ان هوندي به پيپلز پارٽيءَ کي ڪنهن وڏي خوش فهميءَ ۾ ان ڪري به نه رهڻ گهرجي جو عوام جو مزاج محبوبه وانگر نازڪ ۽ دوست وانگر اعتماد جي رشتي تي بيٺل هوندو آهي. جنهن به مهل سندن اعتماد لڏي ويو سڀ ڪجهه پتن جي ماڙيءَ وانگر اچي پٽ پوندو. سچ ته اهو آهي ته عوام پيپلز پارٽيءَ کي وفادار دوست وانگر ان کان وڌيڪ رعايتون ڏنيون ۽ نڀايون آهن، جيتري پيپلز پارٽيءَ موٽ ڏني آهي.