ابڙو اڪيڊمي Abro Academy
2020-11-04
داخلا نمبر 938
عنوان ٿاڻو ڪوٽيرو:
شاخ منڇر گورک گاج دنيا
پڙهيو ويو 1238
داخلا جو حوالو:
هن داخلا جون تصويرون نه مليون
ٿاڻو ڪوٽيرو:
”هي ٿاڻو آهي، هِتي انگريزن جي وقت ۾ ٿاڻو هو!“ جمن هڪ گول ڪوٽيري ڏانهن اشارو ڪيو.
”جمن ترس! پنهنجي بجليءَ کي جهل، هيءَ جاءِ ڪم جي ٿي لڳي“ مون دانهن ڪئي. جمن کي ڳالهه نه وڻي ڇاڪاڻ ته ٽپهري ٿي چڪي هئي ۽ ڪارو ڪوٽ اڃا پرتي هو. کيس واپس کؤٿي تي پهچڻ جي ڳڻتي هئي.
ان ماڳ تي ٻه اڏاوتون هيون، هڪ گول ڪوٽيري جي ۽ ٻي مستطيل. اها مستطيل عمارت انگريزن ٿاڻي طور استعمال ڪئي هوندي. البت گول ڪوٽيرو معمول جي ٻين پراڻن ڪوٽيرن وانگر پنهنجي عمر جو ڪو به ڏس پتو ڏيڻ لاءِ تيار ڪونه هو. هتي وڏن پٿرن جي گول اوساريءَ کان سواءِ ٻيو ڪجهه به نه هو، نه ڪا ٺڪري، نه وري ڪو اوزار يا استعمال ٿيل ڪا شئ.
ڪوٽيري جو لنگهه اوڀر کان ڪجهه اتر رخ ۾ آهي. قطر50 فٽ، اوچائي 4 فٽ ۽ ديوارن جي موڪر به 4 فٽ هئي. مون ڪوٽيري جون تصويرون ورتيون ۽ گهڻو نه ترسياسون.