چانهه (ڪشميري نيرو)

30سينٽي ميٽر (12انچ) جسامت جي هن چانهه پکي جا نرماد هڪجهڙا آهن. سڄو نيرو ٿيندو آهي البت پُٺي هلڪي چاڪليٽي رنگ جي اٿس. کنڀڙاٽيءَ جو مٿيون حصو ڪارو ۽ چوٽين وٽ کنڀ ڪارڙا نيرا ھوندا اٿس. پڇ جو وچون حصو بي رونق نيرو ۽ تقريباّ چورس شڪل جو هوندو اٿس.

نيرو چانهه عام طور تي ڪنهن وڻ، ٿنڀي يا ٽيليفون تار تي ويهي زمين تي وڏن جيتن جي تاڙ ۾ ويٺل نظر ايندو آهي. پکيءَ تي نظر پوندي ئي پنهنجا وڏا پر پکيڙي ان تي جهٽ هڻندو آهي ۽ واپس ڪنھن اوچي جاءِ تي اچي ويهندو آهي. چانهه پکي جيتن کي هوا ۾ ئي شڪار ڪري سگهندو آهي. لڳ جي مند ۾ چانهه نَر هڪ خاص نمائشي اڏار اڏامندو آهي، اهو آسمان ۾ مٿي هليو ويندو آهي ۽ پوءِ خاص قسم جون گُهتون هڻندو آهي جنهن ۾ ان جا سهڻا ٻه رنگا نيرا پَرَ واضح نظر ايندا آهن. ان نمائش سان گڏ هو ڪانءَ جھڙي ۽ ڪَرڙاٽ ٻولي ٻوليندو آھي. چانهه پکي جوڙو ٺاهي پنھنجي آکيري ۽ حدن جي حفاظت ڪندو آهي پر لڏپلاڻ کان اڳ ولر ٺاهيندو آهي. ڪشميري چانھه ماحول : 6 جو پکي آهي.