ڌاڙيلن لاءِ به هڪ ”نصيرالله بابر“ گهرجي

25 آگسٽ 1995ع
ڌاڙيلن لاءِ به هڪ ”نصيرالله بابر“ گهرجي

پني عاقل کان ماتليءَ تائين درياهي ٻيلن ۾ ڌاڙيلن خلاف شروع ڪيل فائنل رائونڊ جو وري ڪو به پتو نه آهي ته ان جو ڇا ٿيو آهي. هزارها سرڪاري هٿياربند ٻيلن ۾ لاهڻ ۽ ٻيلن جو گهيراءُ ڪرڻ کانپوءِ ڪهڙي ڪاميابي حاصل ٿي؟ حڪومت دعويٰ ته تمام وڏي ڪئي هئي، پر پڪڙيو ته ٻليءَ جو ٻچو به ڪو نه ويو! ان جي معنيٰ اها نه آهي ته هاڻي بيگناهه ڳوٺاڻن کي سوگهو ڪري انهن کي ڌاڙيل قرار ڏيئي ”نتيجا“ ڏيکارڻ جي ڪوشش ڪئي وڃي.
وقت اچي ويو آهي ته سرڪار کان بار بار پڇيو وڃي ته توهان گذريل ڀيري جيڪا دعويٰ ڪئي هئي، جيڪو وعدو ڪيو هو ۽ جيڪي فيصلا ڪيا هئا، انهن جو ڇا ٿيو؟ اهي فائل اڃا ميزن تي ستا پيا آهن، ڪٻٽن ۾ بند ٿي ويا يا واقعي اهي حرڪت ۾ آهن؟ اها پڇا ان ڪري به ضروري آهي ته جيئن حڪومت ۽ سياستدان ڪوڙا واعدا ۽ ڪوڙيون ڳالهيون ڪرڻ کان باز اچن ۽ پنهنجي عادت بدلائي فقط اوتري ڳالهه ڪن، جيڪا واقعي ڪري چڪا هجن يا ڪري سگهندا هجن.
ڌاڙيلن خلاف فائنل رائونڊ جي دعويٰ ڪرڻ کانپوءِ سرڪار کي ثابت به ڪرڻو پوندو ته اهو فائنل رائونڊ آهي ۽ اهو آپريشن آخري ڌاڙيل جي موت يا گرفتاريءَ تائين جاري رهندي. ڳالهه رڳو ثابت ڪرڻ جي نه آهي پر هاڻي سرڪار کي اهو به ٻڌائڻ گهرجي ته اهو فائنل رائونڊ گهڻا ڏينهن يا هفتا هلندو؟ ڇا سنڌ جا ماڻهو سڄي عمر انتظار ڪن ۽ ڌاڙيلن کان بچڻ لاءِ سڄي عمر خوف ۾ ڪنبندا رهن يا هنن کي هاڻي فقط مهيني ڏيڍ تائين ڏڪڻو آهي؟ شهرين جو حق آهي ته کين اصل صورتحال جي خبر هجي ته جيئن هو حالتن موجب زندگي گذارڻ جي رٿابندي ڪري سگهن.
هاڻي ته هلندڙ ريل گاڏين مان ڦرن جا واقعا سامهون پيا اچن. چو طرف کان ڌاڙن جا پڙاڏا آهن. ريل ۾ ڌاڙو، روڊ تي ڌاڙو، گهرن تي ڌاڙو، بينڪ تي ڌاڙو، آفيس تي ڌاڙو، ڪچي ۾ ڌاڙو، پڪي تي ڌاڙو ۽ هاڻي جهانگارن ڀرسان بس مان 11 مسافرن جو اغوا هڪ ٻيو وڏو واقعو آهي. خاص ڪري ان مهل جڏهن ان ئي شهر جو هڪ عوامي نمائندو سنڌ جي وڏ وزارت جي ڪرسيءَ تي ويٺو آهي. 11 باندين مان 6 باندي ڌاڙيلن جي پنهنجي مهربانيءَ سان آزاد ٿيا. پوليس کان ته ايترو به نه پڳو جو اها واردات کانپوءِ 48 ڪلاڪن جي عرصي ۾ 11 ماڻهن جي اغوا جو ڪيس داخل ڪري ها. هاڻي دعويٰ ٿي ڪئي وڃي ته جبلن کي ڪڙو چاڙهي ڌاڙيلن تي گهيرو تنگ ڪيو پيو وڃي. جبل نه ٿيا ٻٻرن جي هڙي ٿي! ۽ هوڏانهن سنڌ جا ماڻهو نه ٿيا نرسري ڪلاس جا ٻار ٿيا جن کي ٻڌايو ٿو وڃي ته جبلن کي ڪڙو چاڙهيو ويو آهي. خبر ناهي ته ڪهڙو ڪڙو چاڙهيو آهي! ڇا سنڌ پوليس کي اها خبر آهي ته کيرٿر ۾ ڪيترا لڪ ۽ لڪيون آهن ۽ ڪٿي ڪهڙا جهڏا، غارون، ڇن ۽ چرون آهن؟
حڪومت سنڌ کي گذارش آهي ته پنهنجن عملدارن کي سياستدانن وانگر ڪوڙا پريس بيان جاري ڪرڻ کان جهلي ۽ هدايت ڪري ته ڳالهيون ڇڏي ڪم ڪري ڏيکارين. ڌاڙيلن کي منهن ڏيڻ لاءِ هاڻي پوليس جي پراڻن ڳنن ۽ ڪهاڙين تي ڀاڙڻ بدران ڪو ”نصيرالله بابر“ هٿ ڪيو. پوليس کي وڏي شاباس آهي! انهن جيڪي معرڪا ماريا آهن سا کين به خبر آهي ۽ عوام کي به. پر هاڻي عوام کي وڌيڪ اثرائتو اپاءُ گهرجي.