ڏاند جي چٽسالي:

ڏاند جي چٽسالي:
گاجي شاھه (ماڙي کڏ، ماڙي کڙ يا ’پياري جو دڙو‛) ماڳ تي ڏاند جي چٽسالي مکيه وصف آھي، مھن جي دڙي ۽ ھڙپا ۾ مـُھرن تي ڍڳي جا چِٽ ۽ مورتيون ته موجود آھن پر ٺِڪر تي ڏاند جي چِٽسالي ڪونه آھي. ماڙي کڏ يا گاجي شاھه واري ٺڪراٽي ۾ ٿوھي دار ڏاند جا چِٽ مليا آھن. اھڙو ھڪ اڌ مثال نال مان لڌل ٿانوَن جي چِٽن ۾ به موجود آھن. ڏکڻ بلوچستان جي ڪُلي ۽ ميھِي ماڳن تان اھڙا چِٽ گھڻا مليا آھن ۽ اھي گاجي شاھه ماڳ جي چِٽن سان گھڻي ھڪجھڙائي رکن ٿا.
گاجي شاھه مان لڌل ھڪ علامتي تصوير ۾ ڍڳي جا پير پکيءَ جھڙا ٺاھيا ويا آھن ۽ ھڪ چِٽ ۾ وڻ ۽ ڍڳي جو چِٽ تير جي اَڻيءَ جھڙو ڏيکاريو ويو آھي. ھنن چٽن ۾ پپر جي پنن واري ٺڪري (XXVI-1) به آھي. ھي واقعي دلچسپ اڀياس آھي. Antelope جي سري ھيٺ مجمدار صاحب جن ٺِڪرين ڏانھن اشارو ڪيو آھي سي سرھه يا ھرڻ (XXVI-13-16) سان مشابھه آھن. اھي ٻئي جانور ھن جُوءِ ۾ موجود رھيا آھن. ھڪ ٺِڪري (XXVI-23) تي چِٽيل تصوير ڪلنگي دار پکيءَ (شايد مور) جي آھي جنھن جي چھنب ۾ مئل نانگ آھي. ھن دڙي مان لڌل ٻين شين ۾ مٽيءَ جا پڪل رانديڪا، ڏاندن سميت ٻين جانورن جون مورتيون، راند گاڏيون، مٽيءَ جا ڊگھڙا مڻيا، پڪل ۽ چِٽيل چوڙيون، پٿري چٿڙن جا اوزار، ٽامي جي آر، ڇيڻي ۽ تير جي اَڻي وغيره شامل آھن.
گاجي شاهه کان پوءِ اسان کي گورانڊيءَ کان ڪائي پهچڻو هو.