ڪارو سَر، آئرينِس پرسيِڪا

آئرينِس پرسيِڪا / Eirenis persica / Dark Headed Dwarf Racer

هيءَ بلا آئرينِس جنس جي ننڍن نانگن مان آهي. ان ۾ گهڻيون وصفون ڪولوبر جنس جهڙيون آهن. هي سنهڙيون بلائون عام طور تي جابلو ٽاڪرو علائقن ۾ گاهن ۾ هونديون آهن. رات باش ٿين ٿيون، پٿرن جي هيٺان لڪيون ويٺيون هونديون آهن. ان جنس جون ڪي خاص وصفون هن ريت آهن: مٿو ڪجهه ويٺل، ڳچي غير نمايان، اکيون وڏيون، گول پتليون غير نمايان.
هن بلا جي ڊيگهه 0.38 ميٽر کان 0.41 ميٽر ۽ پڇ 40 کان 50 ميٽر ڊگهو ٿئي ٿو. ان جو جسم هلڪو ڀورو يا مِٽيائون خاڪي ٿئي ٿو. ڇلرن جو پويون حصو ڪارو، ڪڏهن ڪڏهن پٺيءَ طرف 50 کان 60 ڪاريون پاسيريون پٽيون نمايان هونديو آهن. اک جي پويان ۽ ڪنڌ جي شروع ۾ پٺيءَ طرف هڪ گهرو ڀورو پاسيرو نمايان نشان ٿئيس ٿو. پيٽ اڇو هوندو اٿس. هيءَ جنس ترڪي، ايران، عراق، ۽ پاڪستان جي جابلو علائقن ۾ ٿئي ٿي.