ابڙو اڪيڊمي Abro Academy
2020-11-05
داخلا نمبر 1094
عنوان ڪارو ڏينهن: سياسي سج گرهڻ
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1273
داخلا جو حوالو:
هن داخلا جون تصويرون نه مليون
بتي پئي وهي عوام بي وس آهي ۽ حڪومت طاقتور، هيءَ ڳالهه رڳو پيپلز پارٽي سان لاڳو نه ٿي ٿئي پر نواز شريف به ان جا بنياد وجهي چڪو آهي، معين قريشيءَ به ملڪ کي ان ئي دڳ تي لاتو آهي ۽ آءِ ايم ايف ۽ ورلڊ بينڪ جا بنيادي شرط به اهي ئي آهن.
سوال فقط اهو آهي ته ملڪ جي ترقي ڪنهن جي لاءِ ڪئي وڃي ٿي؟ جيڪڏهن حڪومت ۽ عالمي مالياتي ادارن جو جواب ”عوام لاءِ“ آهي ته پوءِ هو غلط بيانيءَ کان ڪم وٺي رهيا آهن. اها ڳالهه پڌري پٽ آهي ته عوام جي ڪا به ترقي ڪو نه ٿي رهي آهي. سڄي ترقي سرمائيدارن، هاشم سيٺ پارن، فائونڊري مالڪن، مخصوص ڪميشن ايجنٽن، ”عوامي نمائندن“ ۽ اعليٰ عهدن تي ويٺل ڪامورن جي ٿي رهي آهي. عوام ڀلي ته عدالتن ۾ اهو ثابت ڪري نه سگهي ته ڪهڙي صاحب ڪيترو ڌن ڪمايو آهي پر اهي ماڻهو عوام جي اکين مان ڳجها ته ڪو نه آهن جيڪي ڪالهه تائين 800 کان 1200 سي سي ڪارن ۾ گهمندا هئا ۽ اڄ پيجارو ۽ لينڊ ڪروزن ۾ گهمن ٿا، جيڪي ڪالهه قرض تي هلدنا هئا، اڄ ڪروڙ پتي بلڪ ارب پتي بڻجي چڪا آهن. عوام ته اتي جو اتي بيٺو آهي. ساڳيا لاٽون ۽ ساڳيا چگهه واري صورتحال آهي. هڪڙا بيروزگار لڳا ويٺا آهن ۽ ٻيا ٿا ”ڦري وٺڻ“ تي سوچين ۽ ٻيا ٻهراڙين ۾ زرعي مارڪيٽ سرشتي جي گهاڻي ۾ پيڙجن! انهن جي سماجي ۽ معاشي حالت ۾ ڪو ٽڪي برابر به سڌارو آيو آهي ته سرڪار ٻڌائي!