ڪارو ڪرئون

ڪارو ڪرئون / Whitehead Black lizard /Laudakia fusca





جابلو ڍورين ۾، ۽ نئن جي ويجهو ڪنڌين تي نيم صحرائي حالتن ۾ وڏين ڇِپن تي تمام تيزيءَ سان ڊوڙي ٿو. وڏن پٿرن ۽ ڇِپن تي پنهنجا پير ايتري مضبوطيءَ سان چنبڙائي مٿي چڙھي ٿو جيئن ڪا گهريلو ڪرڙي ديوارن تي هلندي آهي. پُڇ کان ڳچيءَ تائين ڪارو پر مُنڍي اڇي ٿئيس ٿي. ڪو ڪو سڄو ڪارو به هوندو آهي. اکيون ھيڊيون پر انھن جي ماڻڪي ڪاري ٿئيس ٿي. ٽنگون ٻانھون سنھڙيون پر مضبوط اٿس، اڳين ٻانھن تي زور ڏيئي اڳيون جسم ۽ منڍي کڻي ھيڏانھن ھوڏانھن پيو ڏسندو آھي. پڇ سنھڙو ۽ ڊگھو ھوندو اٿس. اڪثر ٽولين ۾ يا ويجھو ويجھو رهندو آهي. ڪارو ڪرئون کيرٿر جي اوڀر وارن نئن جي ماحول ۾ ڪالونيون ٺاھي رھي ٿو. ان جو گذارو ننڍڙن جيتن وغيره تي آھي. کيرٿر ۾ نئين جي پيٽ ۾ چشمن جي ويجھو ڇپن جي وٿين ۾ رھي ٿو. ھي سانڊو ھندو ڪش کان کيرٿر تائين عام آھي.