ابڙو اڪيڊمي Abro Academy
2020-11-06
داخلا نمبر 1198
عنوان ڪالاباغ: عبدالله شاهه جا خيال بدلجي ويا؟
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1280
داخلا جو حوالو:
هن داخلا جون تصويرون نه مليون
20 جنوري 1996ع
ڪالاباغ: عبدالله شاهه جا خيال بدلجي ويا؟
سيد عبدالله شاهه ٽوڪيو ۾ هي ڇا فرمايو آهي؟ ڇا ايئن سمجهجي ته سنڌ حڪومت جو سربراهه جاپان جي دوري وقت سنڌ جو موقف سنڌ ۾ ئي چئي ڇڏي ويو هو؟ هڪ اخبار کي انٽرويو ڏيندي شاهه صاحب چيو، ”جيڪڏهن ڪالاباغ ڊيم بابت صوبن جا انجنيئر گڏجي فيصلو ڪري وٺن ته اسان کي اعتراض ڪو نه آهي، جيڪڏهن پنجاب کي هڪ هزار ايڪڙن جو فائدو پهچي ٿو ته اسان 50 هزار ايڪڙن جي قرباني ڏيڻ لاءِ تيار آهيون، وفاقي حڪومت ننڍن صوبن کي مطمئن ڪرڻ لاءِ بند جي ڊزائين ۾ ڪجهه تبديلي ڪري ورتي آهي، وزيراعظم قومي سوالن تي صوبن ۾ اتفاق راءِ چاهي ٿي ۽ بند کي هروڀرو سياسي مسئلو بڻايو ويو آهي.“
جڏهن ڪنهن تڪراري سوال تي لفظ ”جيڪڏهن“ استعمال ٿئي، تڏهن سمجهڻ گهرجي ته ڪا ”گنجائش“ ڪڍي پئي وڃي. چونڊيل وزيراعظم جنهن لاءِ قوم کي وڏو احترام آهي، صوبن جي هم خياليءَ کي اوليت ڏيڻ چاهي ٿي پر هيءَ ڪهڙي اوليت آهي جنهن ۾ بند جي اڏاوت لاءِ ايڏو دٻاءُ وڌو وڃي ٿو ۽ نيٺ فني بنيادن جا دليل ڏيئي صوبائي حڪومتن جا موقف بدلايا وڃن ٿا. سيد عبدالله شاهه پاڻ سنڌ نه آهي ۽ نه وري سنڌ جو عوام سنڌ جي اهم ترين سوال تي فقط ساهه صاحب جي قائل ٿيڻ کي ڪافي سمجهي ٿو. جڏهن انجنيئر ويهارڻ جي ڳالهه ڪئي وڃي ٿي، تڏهن به اهو امڪان موجود آهي ته اهي انجنيئر مصلحتن جو شڪار هجن يا ٿي وڃن.
سيد عبدالله شاهه هاڻي ڪالاباغ بند جي مخالفت کي ”هرو ڀرو سياسي مسئلو“ سنڌي سنڌ جي عوام کي نه رڳو حيران ڪري ڇڏيو آهي پر اهو سوچڻ تي مجبور ڪري ڇڏيو آهي ته وفاقي حڪومت سنڌ جي معاشي شهه رڳ کي وڍڻ جو فيصلو ڪري شاهه صاحب جي سياسي ڪيريئر جو آخري پنو اٿلائڻ جو فيصلو به ڪري ڇڏيو اهي. پيپلز پارٽيءَ جي حڪومت ڪالاباغ بند جي حوالي سان جيڪي پيش قدميون ڪري رهي آهي ۽ جيڪي بنياد رکڻ چاهي ٿي، اهي پارٽيءَ جي مقبوليت کي گهٽائڻ ۾ اهم ڪردار ادا ڪري سگهن ٿا. پيپلز پارٽيءَ جي اڳواڻن کي پنهنجي پارٽيءَ جي سياسي ساک عزيز هجي يا نه هجي، سنڌ کي پنهنجو معاشي مفاد تمام پيارو آهي ۽ سنڌ اها ڳالهه قيامت تائين پسند نه ڪندي ته سنڌوءَ جي پاڻيءَ جي چاٻي پنجاب وٽ هجي، توڻي جو ڊزائين ۾ تبديلي ۽ گهٽ مقدار ۾ پاڻي جي اسٽوريج جي ڳالهه حقيقت هجي!
ڪجهه هفتا اڳ سرحد صوبي جي وڏي وزير به لڳ ڀڳ اهڙائي جملا ڳالهايا هئا ۽ ”سرحد جي عوام جي مفادن کي قربان ڪرڻ“ لاءِ تيار ٿي ويو هو. هاڻي سنڌ جو وڏو وزير پنجاب جي هڪ هزار ايڪڙن جي فائدي لاءِ سنڌ جا پنجاهه هزار ايڪڙ قربان ڪرڻ لاءِ تيار آهي. جناب! ڪهڙي ڪارڻ؟ سنڌ پنهنجن مفادن جي قرباني ڏيڻ لاءِ هرگز تيار نه آهي. توهان پنجاهه هزار ايڪڙ ڏيڻ لاءِ تيار آهيو، سنڌ اهڙي ڪنهن امڪان تي سوچڻ لاءِ به تيار نه آهي. سوچجي تڏهن، جڏهن ڳالهه منجهيل هجي. تازو هڪ ڀيرو وري وفاق مان غلام مصطفيٰ کر وڏي آواز چيو آهي ته ”ڪالاباغ بند ٺهندو ۽ ضرور ٺهندو.“ تڏهن سنڌ جي آبپاشي وزير سنڌ جي ماڻهن کي ٻڌائڻ لاءِ چيو هو ”ڪو نه ٺهندو!“. صوبائي آبپاشي وزير هاڻي ڇا چوڻ پسندو ڪندو، جڏهن سنڌ جي وڏي وزير اڻسڌن لفظن ۾ ڪالاباغ بند جي حق ۾ ”هائوڪار“ ڪئي آهي؟