ابڙو اڪيڊمي Abro Academy
2020-11-05
داخلا نمبر 1058
عنوان ڪراچيءَ جي سنڌين جو اعتماد نه لوڏيو
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1100
داخلا جو حوالو:
هن داخلا جون تصويرون نه مليون
25 سيپٽمبر 1995ع
ڪراچيءَ جي سنڌين جو اعتماد نه لوڏيو
آخر ايئن ڇو پيو ٿئي ته ملڪ جي حفاظت ڪندڙ ادارا ڪنهن نه ڪنهن بهاني سان سنڌ جي قديم آبادين ۾ تاءُ پکيڙڻ جي ڪوششن ۾ مصروف ٿي ويا آهن؟ اڃا سنڌوءَ جي ڊيلٽا ۾ مڇي مارڻ بابت مهاڻن جي حقن تي رينجز جي پاران اڳرائيءَ خلاف هڪ مهيني واري ڊگهي هڙتال مس ختم ٿي آهي ته وري منهوڙو ڪنٽونمينٽ ۾ توسيع جو معاملو ڪاڙهيو ويو آهي.
ڪنٽونمينٽ ۾ توسيع سان ڪراچيءَ جي ڪنارن جا سڀ کان قديم ڳوٺ ڪياماڙي، منهوڙو، شمس پير، ڪڪا وليج، ماڙيپور، سومار ڳوٺ، بابا ۽ ڀٽ متاثر ٿيندا. انهن مان ڪي ٻيٽ اهڙا آهن، جتي تر ڇٽڻ جي جاءِ نه آهي، ان صورت ۾ ڪنٽونمينٽ جي توسيع مان ڇا حاصل ٿيندو؟ علائقي جا ماڻهو ان ڊپ ۾ وڪوڙجي ويا آهن ته هاڻي کين اتان لڏائڻ يا سوڙهو ڪرڻ جو سلسلو شروع ڪيو ويندو. ظاهر آهي ته جڏهن امن امان سان زندگي گذاريندڙ ماڻهن کي اوچتو غير يقينيءَ واري صورتحال سامهون اچي ته هو تانءَ ۾ ضرور ايندا.
ان توسيعي پروگرام تي لياري ڊيولپمينٽ اٿارٽي ۽ فشر مينز سوسائٽيءَ اعتراض واريا پر پاڪستان نيويءَ انهن کي به رد ڪيو آهي. خبرن موجب بحريه اختياري وارا ڪافي وقت کان ان ڪوشش ۾ هئا ته منهوڙو ڪنٽونمينٽ توسيع ڪجي پر هر ڀيري ماڻهن جي مزاحمت سبب ايئن ڪري نه سگهيا هئا. ڊيلٽا ۾ رينجرز سان مهاڻن جي مفادن جي ٽڪراءَ سبب رينجرز کي سڄي ملڪ ۾ بدنامي ملي. هاڻي نيويءَ وارا قديم ۽ ڳتيل آبادين سان ٽڪراءَ ۾ آيا آهن ته انهن علائقن جي ماڻهن احتجاج جو رستو وٺڻ جو اعلان ڪيو آهي. بحريه جو فيصلو ان لحاظ کان حيرت جهڙو آهي ته تازو وزيراعظم جي حڪمن سان انهن ڳوٺن کي ليز به ڪيو ويو آهي.
ڪراچيءَ جي سامونڊي ڪنڌيءَ تي قائم قديم ڳوٺن لاءِ پيدا ڪيل هي پريشاني پنهنجي جاءِ تي! ان سان گڏوگڏ بحريه پاران گهاري ۽ ڪوهستان جي پراڻن ڳوٺن کي خالي ڪرائڻ جا نوٽيس الڳ جاري ڪيا ويا آهن. خبرون چون ٿيون ته اهي زمينون فوجي مقصدن لاءِ خالي ڪرايون پيون وڃن. سامونڊي فوج کي بنيادي طرح ڪل 3 هزار ايڪڙ زمين ڏيڻ جي منظوري مليل آهي پر خبرن موجب جنهن طرح نوٽيس جاري ڪيا پيا وڃن، ان سان زمين 13 هزار ايڪڙن کان وڌي وڃي ٿي، ان ڪري 21 ڳوٺ متاثر ٿي رهيا آهن.
بحريه جنهن ريت ڪراچيءَ جي چو طرف والار جو ڪم شروع ڪيو آهي، اهو ٿي سگهي ٿو ته ڪنهن نئين دفاعي رٿابنديءَ جو سلسلو هجي پر اها حيرت جي ڳالهه آهي ته ان رٿابنديءَ سان انهن ئي ماڻهن جا پير اکوڙيا پيا وڃن، جن جي خلاف هن وقت ڪراچيءَ ۾ نسلي اڳرائي جاري آهي. اهي ماڻهو پاڪستان نيويءَ سان 48 سالن کان پر امن پاڙيسرين وانگر رهي رهيا آهن ۽ اڄ تائين اهڙو ڪو به واقعو سامهون نه آيو آهي، جنهن جي بنياد تي چئي سگهجي ته اهي قديم لوڪ نيويءَ وارن لاءِ ڪنهن قسم جو مسئلو بڻيا آهن. اهي ته هٿئون ڪراچيءَ جا اصل وارث هئڻ جي ناتي ڪراچيءَ جي دفاع جي سلسلي ۾ انهن کان وڌيڪ اعتماد جوڳا آهن، جن جو ڪراچيءَ سان محض مالي مفاد ڳنڍيل آهي.
ان پس منظر ۾ قديم سنڌين جي اعتماد کي لوڏيو پيو وڃي ۽ سندن دلين تي نقش ڪيو پيو وڃي ته پاڪستان جا حفاظتي ادارا توهان جا سڄڻ ناهن. پنهنجي زمين تان ته فقط دشمن تڙپندا آهن. جيڪڏهن پاڪستان جا حفاظتي ادارا مقامي ماڻهن جا سڄڻ آهن ته پوءِ دلين تي غلط نقش اڪيرڻ جون رٿائون ڇو ٿيون جوڙيون وڃن؟ خدا ڄاڻي ته ڇو انهن ادارن جي ساک هڪ ڀيرو ٻيهر خراب ڪرڻ جو رستو ورتو ويو آهي. جن ڪراچيءَ ۾ امن لاءِ تمام اهم ڪردار ادا ڪري مس مس وڃي پنهنجي ساک بحال ڪرائي آهي.