ابڙو اڪيڊمي Abro Academy
2020-11-06
داخلا نمبر 1202
عنوان ڪراچيءَ ۾ پٺاڻن کي قربان ڪرڻ جي ڳالهه
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1252
داخلا جو حوالو:
هن داخلا جون تصويرون نه مليون
ڪراچيءَ ۾ پٺاڻن کي قربان ڪرڻ جي ڳالهه
حڪومت برطانيا دليل قبول ڪرڻ نه چاهي ته سندس مرضي! ڳالهه ته اڳي به پڌري هئي ۽ هاڻي ته الطاف حسين به اڻسڌيءَ طرح قبول ڪري ورتو آهي ته ڪهڙا ڪهڙا دهشتگرد سندس تنظيم جي ڊسيپلين ۾ هئا. هڪ نالو فهيم ڀوري جو آهي، جنهنجي گرفتاريءَ کانپوءِ ريحان ڪاڻو ۽ سندس ساٿي گرفتار يا مقابلي ۾ قتل ٿيا. حڪومت چوي ٿي ته ريحان ڪاڻو ڪراچيءَ ۾ ڪنهن وحشي آدمخور وانگر پئي ڦريو ۽ ڪي 100 کن ماڻهو ماريا هئائين.جنهن ڏينهن تي ريحان ڪاڻو ۽ سندس چار ساٿي مارجي ويا ان ڏينهن تي الطاف حسين وري اعلان ڪيو ته ريحان ڪاڻو ۽ مارجي ويل ٻيا فرد به ايم ڪيو ايم جا هئا.
ايئن ٿو لڳي ته سنڌ مان گرفتار ٿيندڙ هڪ هڪ فرد ايم ڪيو ايم جو آهي ۽ جيڪو به شخص پوليس جي هٿان گرفتار ٿئي ٿو، اهو به ايم ڪيو ايم جو آهي. ايئن ڪو ٻيو ڪو نه ٿو چوي، خود الطاف حسين اها دعوا ڪري ٿو. اڄ تائين پوليس مقابلي يا پوليس جي تحويل ۾ مئل هر دهشتگرد کي الطاف حسين ايم ڪيو ايم جو ”معصوم ڪارڪن“ قرار ڏنو آهي. جيڪڏهن الطاف حسين پاڻ قبول ڪري ته فهيم ڪمانڊو، ريحان ڪاڻو، نعيم شري ۽ الائي ته ڪهڙن ڪهڙن عجيب غريب نالن وارا سرگرم هٿياربند سندس ساٿي آهن ته پوءِ باقي ڪهڙو دليل بچي ٿو جو حڪومت برطانيا چوي ٿي ته الطاف حسين جي ٻانهن پاڪستان جي حوالي ڪرڻ لاءِ الطاف حسين جي خلاف پيش ڪيل ثبوت ڪافي ناهن. برطانيا جو اهڙو ئي ڪو مافيائي چيف برطانيا ۾ دهشتگردي ڪرائيندو هجي ها ۽ پاڪستان مان سيٽلائيٽ تي هدايتون ڏيندو رهي ها ته برطانيا ڪڏهوڪو هن جي ٻانهن وٺي چڪي هجي ها!
حڪومت برطانيا شايد فقط اهي اخبارون پڙهندي آهي، جن ۾ اهو ٻڌايل هوندو آهي ته ڪراچيءَ ۾ ”مهاجر“ ختم ٿي ويا آهن ۽ نوبت اتي پهتل آهي جو ويچاريون ”مهاجر“ عورتون نه رڳو پنهنجن مردن کي ڪلهو ڏين يون پر انهن جي جنازي نماز به پاڻ پڙهڻ تي مجبور ٿي ويون آهن.
ڪراچيءَ ڏانهن قادر مگسيءَ جي امن مارچ کانپوءِ اجمل خٽڪ به سنڀريو آهي، جنهن ڪراچيءَ جو سياسي تجويز ڪندي عقل ۽ دانش جا واهه وهائي ڇڏيا آهن. هو چوي ٿو ته ”سنڌ جو ورهاڱو الطاف حسين جي نه، بينظير ڀٽو جي خواهش آهي ۽ نوجوانن کي هٿڪڙيون پارائي مارڻ مردانگي نه آهي.“ اجمل خٽڪ ڪراچيءَ ۾ امن لاءِ 25 لک پٺاڻن کي به متحرڪ ڪرڻ چاهي ٿو ۽ اعلان ڪري چڪو آهي ته ”پارٽيءَ اندر اهڙو فيصلو ٿي چڪو آهي ۽ پٺاڻن کان قربانيءَ جي گهر ڪئي ويندي.“ هو اهو به انڪشاف ڪري ٿو ته جلد ئي نواز شريف ۽ الطاف حسين ”پاڪستان ملي اتحاد“ جو اعلان ڪندا.
ڪراچيءَ ۾ 25 لک پٺاڻن کي دهشتگرديءَ خلاف سرگرم ڪرڻ ۽ دهشتگرديءَ جو الزام حڪومت (پيپلز پارٽيءَ) تي رکڻ مان ڇا مردا آهي جڏهن ته اجمل خٽڪ پاڻ نواز شريف جو ۽ نواز شريف ايم ڪيو ايم جو اتحادي آهي. اجمل خٽڪ جڏهن ”هٿڪڙيون پاتل نوجوانن جي موت“ جو حوالو ڏئي ٿو ته اصل ۾ اهو ايم ڪيو ايم جي ان موقف جي حمايت ڪري ٿو ته مرندڙ فرد ”معصوم مهاجر“ آهن ۽ انهن جو دهشتگرديءَ سان ڪو به تعلق نه آهي. پر، اجمل خٽڪ اهو ڪو نه ٻڌايو ته ڪراچيءَ ۾ ٻورين ۾ بند لاش ڪير ڏئي رهيو آهي ۽ بسن ۾ بم ڪير ڦاڙي رهيو آهي؟ حيرت آهي ته جڏهن بگهاڙي ٽولا بيگناهه ۽ بي هٿيار ماڻهن کي بيدرديءَ سان چيرين ۽ ڦاڙين ٿا ته ان کي بزدلي ۽ بيرحمي چوڻ لاءِ اجمل خٽڪ وٽ ٻه اکر به ڪو نه آهن پر جڏهن اهي ئي بي رحم پاڻ مارجن ٿا ته سندن موت ”معصومن جو قتل“ بڻجي وڃي ٿو! امن پسند ماڻهن وٽ هاڻي آسمان واري کي دانهن ڏيڻ کانسواءِ ڪا ٻي واٽ ڪو نه بچي آهي!
.... ۽ مسٽر اجمل خٽڪ 25 لک پٺاڻ متحرڪ ڪري کانئن قربانيءَ جي جيڪا گهر ڪئي آهي، ان جو ڇا مطلب آهي؟ اجمل خٽڪ، نواز شريف ۽ الطاف حسين جو ”ڪڙي ڪڙيءَ ۾ ڳنڍيل“ اتحاد ڇا ٿو تجويز ڪري؟ صرف هڪ ئي اڳڪٿي ڪري سگهجي ٿي ته اها ڌر بندي ظاهري طرح حڪومت جي خلاف پر اندروني طرح ڪراچيءَ جي سنڌي ۽ بلوچ آباديءَ جي خلاف ايم ڪيو ايم سان جنگي اتحاد آهي. اجمل خٽڪ ڪراچيءَ ۾ رهندڙ پٺاڻن کي ڪنهن به امڪاني خانه جنگيءَ ۾ ايم ڪيو ايم سان ساٿ ڏيڻ جو سڏ ڏنو آهي، جنهن مان بيو ڪجهه ٿئي يا نه ٿئي گهٽ ۾ گهٽ ايترو ٿئي ته ايم ڪيو ايم هٿان ڪو پٺاڻ نه مري، باقي سنڌ جا اصلوڪا ماڻهو مرن ته ان حوالي سان جمل خٽڪ غير جانبدار ۽ پر امن رهندو.
اجمل خٽڪ ڪراچيءَ ۾ پٺاڻ فورس تيار ڪري رهيو آهي، نعرو امن جو هڻي ٿو پر اتحاد ايم ڪيو ايم سان ڪري ٿو. هيءَ عجيب ۽ خطرناڪ چال آهي. عوامي نيشنل پارٽي ”پنهنجي لائين“ ڏئي ڇڏي آهي. ظاهري طور، بيان ۾ ڀلي ته اجمل خٽڪ ايئن چوي ته اسان جي سنڌ تي ڪا دعوا ڪو نه آهي رڳو عزت سان رهڻ چاهيون ٿا ۽ ڀلي ته نواز شريف ايئن چوي ته هو ڪنهن به نئين صوبي جي حق ۾ ڪو نه آهي، سندن اصل ارادن جو رخ سندن حڪمت عملي ۽ اتحاد مان ظاهر آهي.
دهشتگردن جي قتل جو سوال نواز شريف قومي اسيمبليءَ ۾ اٿاري ايم ڪيو ايم کي سياسي طرح مضبوط ڪندو. ايم ڪيو ايم ڇاڪاڻ ته ڪراچيءَ ۾ قانون جي سخت گرفت سبب پنهنجا ويڙهاڪ وڃائيندي پئي وڃي، ان ڪري اها کوٽ پوري ڪرڻ لاءِ اجمل خٽڪ پٺاڻن کي قربان ڪرڻ لاءِ اڳتي آيو آهي. اهي پٺاڻ شايد افغان هٿيارن سان ڪراچيءَ ۾”سرگرم“ ٿيندا جيئن مسٽر خٽڪ چيو آهي. جيڪڏهن سچ پچ ايئن ٿيڻ طرف وڃي رهيو آهي ته پوءِ باچا خان جي روح سميت سڄي پشتون آبادي ۽ قيادت کي سنڌ جي ميار آهي.