ابڙو اڪيڊمي Abro Academy
2020-11-06
داخلا نمبر 1220
عنوان ڪراچي يونيورسٽي ۾ ميرٽ جو خون
شاخ پنهونءَ ڪارڻ پَٻ ۾: ايڊيٽوريل-2 روزاني برسات ڪراچي
پڙهيو ويو 1136
داخلا جو حوالو:
هن داخلا جون تصويرون نه مليون
6 فيبروري 1996ع
ڪراچي يونيورسٽي ۾ ميرٽ جو خون
مسٽر ممتاز ڀٽو چوي ٿو ته ڪراچيءَ ۾ سنڌي-مهاجر نه، ايم ڪيو ايم-پ پ جهيڙو آهي. خدا ڪري ته ڪو جهيڙو هجي ئي نه، سنڌي – مهاجر ته بنهه نه هجي پر ان خبر کي ڪيئن نظر انداز ڪجي ته ڪراچي يونيورسٽيءَ ۾ اهڙي داخله پاليسي هلائي وئي آهي جو اتي ڏهن سالن دوران ٻهراڙين مان ايندڙ سنڌي شاگرد هاڻي محض هڪ سيڪڙو وڃي بچيا آهن... ۽ اهو ڪهڙو تعليمي ڪلچر آهي جنهن ۾ ڪوٽا سسٽم جي مخالفت ۽ حمايت مهل مختلف وقتن تي مختلف تشريحون پنهنجي دل مان جوڙي ڏنيون وڃن ٿيون! هڪ خبر چوي ٿي ته ڪراچي يونيورسٽي جي 500 کن تدريسي عملي ۾ فقط 7 سنڌي استاد آهن، جيڪڏهن سنڌي آباديءَ جي شرح 2 سيڪڙو کان به گهٽ آهي؟
اها صورتحال پنهنجي جاءِ تي، اهو ڪهڙو تعصب کان پاڪ انتظامي ۽ تعليمي ماحول آهي جنهن ۾ ميرٽ تي آيل هڪ ڇوڪريءَ کي محض ان ڪري حيلن بهانن سان کڄڻ نٿو ڏنو وڃي ته اها سنڌي ڳالهائيندڙ آهي! ليڪچرارن جي ڀرتي لاءِ مقرر ٿيل سليڪشن بورڊ کي ان ڪهڙي دلچسپي آهي جو گورنر جا حڪم پاسيرا ڪري ميرٽ تي چونڊيل اميدوار ڇوڪري ثريا شاهين قريشيءَ کي ڀرتي ٿيڻ کان روڪڻ لاءِ ٻيهر انٽرويو ڪرائڻ جي رٿ رٿي وئي آهي؟ ڪراچي يونيورسٽيءَ جا ”سمجهدار استاد“ ميرٽ جو خون ڪري سنڌي –مهاجر راند نه پيا ڪن ته ٻيو ڇا پيو ٿئي؟ وائيس چانسلر صاحب ته شايد ان نظام جو بيوس ريفري هجي يا پاڻ ان جو حصو هجي، چانسلر صاحب ان تعليمي ڪلچر کي ڪيئن ڏسندو، جيڪو ساڳي سنڌ جو گورنر به آهي!