ڪوئو (هيڊو ناسي جيربل)

هيڊو ناسي جيربل ڪوئو Indian Gerbil / Tatera indica /
ڪوئو (هيڊو ناسي جيربل)
ڪوئي جهڙي هن جانور جي پٺي ڳاڙهسري اوٺي ۽ پيٽ اڇو ٿئي ٿو. پيٽ ۽ پٺيءَ جا رنگ هڪدم ڌار ٿي وڃن ٿا. پڇ جو رنگ مٿان اڇو ۽ هيٺ ڪارسرو سرمائي اٿس. ڪارين ۽ وڏين اکين جي پاسي کان اڇڙي ليڪ، پڇ تي وار ۽ ڇيڙي ۾ سخت وارن جو ڇڳو اٿس. عام طور تي انگريزي اکر “U” جي شڪل جو ٻِـر ٺاهيندو آهي. اڪثر ٻرن کي هڪ کان وڌيڪ لنگهه هوندا آهن ته جيئن خطري وقت ڪنهن به پاسي کان ٻِـر ۾ گهڙي يا اتان ڀڄي سگهي. رات جو ٻاهر نڪرندو آهي ۽ فصلن کي ڏاڍو نقصان پهچائيندو آهي. مادي سال ۾ ٻه ڀيرا ۽ هر ڀيري سراسر 5 ٻچا ڏئي ٿي. گهڻائي ۾ هجڻ سبب چٻرن، ٻلين، ڄاهن، لومڙين ۽ ٻين جانورن جو عام جام شڪار بڻبو آهي. هي ماحول : 6 جو مماليه آهي.