ابڙو اڪيڊمي Abro Academy
2020-10-13
داخلا نمبر 723
عنوان ڪورڪَنڊ
شاخ ڪرڙانگ
پڙهيو ويو 1134
داخلا جو حوالو:
ڪورڪَنڊ
ڪورڪَنڊ
0.56 ميٽر کان 0.60 ميٽر ڊيگه واري هن بلا جي ڊيگهه 50 کان 70 ملي ميٽر ٿئي ٿي. ان جو رنگ هلڪو ڀورو خاڪي ٿئي ٿو. جسم جي ٻنهي پاسي 20 کان 25 ننڍڙا چٽ هوندا اٿس، جن جي چوڌاري اڇا ڇِلر هوندا آهن. جسم جي پوئين حصي ۾ نشان وڌيڪ نمايان ٿينس ٿا. پيٽ اڇو ۽ پڇ جي هيٺان پاسيريون ڪاريون ليڪون هونديون اٿس. پچ جو ڇيڙو بلڪل هيڊو ٿئيس ٿو.
هيءَ جنس ايرسٽيڪوفس) (Eristicophis جنس ۾ اڪيلو قسم آهي. ان جو جسم ننڍو، ٿلهڙو ۽ مضبوط ٿئي ٿو. مٿو نمايان طور ويڪرو هوندو اٿس. ڳچي ۽ ڪنڌ نمايان ٿينس ٿا جن تي عام طور اکين کان پوئتي ڪياڙيءَ تائين هڪ اڇي ۽ ڪاري ليڪ هوندي اٿس، ٻوٿاڙ وارو اڳيون ڇلر وڏو ۽ ويڪرو ٿئيس ٿو. ٻوٿاڙ جي پاسن وارا ڇلر به ويڪرا ۽ ٻاهرين پاسي ڪنهن پَن جي پاسن وانگر نڪتل ٿين ٿا. ناسون سوڙهيون هونديون اٿس.
هيءَ بلا ريتيلي ميدان ۾ هوندي آهي، جسم کي هيڏانهن هوڏانهن حرڪت ڏيئي هڪدم واريءَ هيٺ لڪي ويهندي آهي. فقط نڪ ۽ اکيون ٻاهر هونديون اٿس. اهڙيءَ طرح شڪار جو انتظار ڪندي آهي. هيءَ بلا فقط رات جو سرگرم رهي ٿي. تمان خبردار ۽ خارباز آهي. ڪاوڙ مهل زور زور سان شوڪاريندي آهي ۽ پنهنجي جسم کي هڪٻئي مٿان وَر ڏيئي زمين تان مٿي کڻي وٺندي آهي، ۽ زوردار حملو ڪندي آهي. اڪثر ڪوئا ۽ ڪِرڙيون شڪار ڪندي آهي.
هي بلا خاص ڪري بلوچستان جي صحرائي علائقي ۾ ٿئي ٿي، ان کان سواءِ ايران، افغانستان۽ سنڌ وغيره ۾ به ٿئي ٿي.