ابڙو اڪيڊمي Abro Academy
2020-11-05
داخلا نمبر 1071
عنوان ڪور ڪمانڊرن جي اجلاس ۾ الطاف حسين کي جواب
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1149
داخلا جو حوالو:
هن داخلا جون تصويرون نه مليون
ڪور ڪمانڊرن جي اجلاس ۾ الطاف حسين کي جواب
الطاف حسين ڪراچيءَ ۾ گهرو لڙائيءَ جي ڌمڪي ڏيڻ ۽ دهشتگرديءَ ۾ اضافي سان گڏ ٽن ڌرين کي پاڪستان جي سياست ۾ مداخلت جي درخواست موڪلي آهي. اقوام متهده جو سيڪريٽري جنرل، صدر پاڪستان ۽ پاڪستان جي هٿياربند فوج جو سربراهه. پاڪستان جي فوج کي مداخلت جي دعوت ڏيڻ جي معنيٰ آهي صدر ۽ وزيراعظم جي اختيارن کي اورانگهڻ لاءِ اڀارڻ. ٻي معنيٰ ۾ مارشل لا هڻڻ جي صلاح ڏيڻ. ايئن ئي 1977ع ۾ به ڪيو ويو هو، جنهن کي بهانو بڻائي ضياءُ الحق سڀ ليڪا لتاڙي ويو.
بري فوج جي ڪور ڪمانڊرن جي اجلاس ۾، جيڪو 30 سيپٽمبر تي جي ايڇ ڪيو ۾ آرمي چيف جنرل عبدالوحيد جي صدارت ۾ ٿيو، گهڻيون ئي ڳالهيون بحث ۾ آيون پر ڪجهه ڳالهيون ملڪ جي سياسي ماحول سان به جڙيل هيون. مثال طور آرمي چيف چيو ته ”فوج وقت اچڻ تي قوم کي مايوس نه ڪندي. فوجي قاعدا فوجيءَ کي سياستدان سان ملاقات يا رابطي جي اجازت نٿا ڏين، ڊسيپلين جي ڀڃڪڙيءَ تي ڪارروائي ٿيڻ گهرجي جمهوريت ۾ فوجي مداخلت جي توقع ڪندڙن جي حوصلي شڪني ٿيڻ گهرجي، فوج جو ڪم سرحدن جي حفاظت ڪرڻ آهي، سياست ۾ ملوث ٿيڻ نه.“ جنرل وحيد اها به ڳالهه ڪئي ته فوج به احتساب کان مٿي نه آهي ۽ ان ۾ احتساب جو عمل شروع ڪيو ويو آهي.
جنرل صاحب جون سڀ ڳالهيون، جيڪڏهن فوج واقعي انهن تي عمل ڪري، تسلي ڏيندڙ آهن. فوج جو ادارو تنقيد کان مٿي نه آهي، ماضيءَ ۾ اٻهرن جنرل هٿان ان جي ڦٽل ساک اڃا پوريءَ طرح بحال نه ٿي آهي ۽ عوام کي هر وقت ان طرف کان ڌڙڪو رهي ٿو. جنرل وحيد جي تقرير ٻن لحاظن کان ڏاڍي اهم آهي. هڪ طرف هو فوج جي اصل ڪردار تي زور ڏئي رهيو آهي ته ٻئي طرف فوج اندر ڪرپشن ۽ ڦٽل ڊسيپلين ڏانهن اشارو ڏئي احتساب جي ڳالهه ڪري ٿو. چڱو ٿيو جو جنرل صاحب پاڻ ئي ان ڳالهه تي زور ڏنو جيڪا غير فوجي حلقن مان اٿڻ مناسب نه هئي.
باقي جمهوري ادارن ۽ جمهوريت ۾ مداخلت لا الطاف حسين پاران آرمي چيفکي ٿيندڙ سڏن جو جواب وقتائتو آهي. عوام فوج ۽ حڪومت مان توقع رکي ٿو ته فوج ان موقف تي قائم رهندي ۽ فوج کي مداخلت لاءِ اڀارڻ جي حوصلي شڪني محضزباني ڪلامي نه، آئين تي عمل جي صورت ۾ ٿيندي. فوج کي بغاوت لاءِ اڀارڻ جي سزا آئين ۾ تجويز ٿيل آهي.