ابڙو اڪيڊمي Abro Academy
2020-11-05
داخلا نمبر 1024
عنوان ڪوڙ کي پير نه سهي، پَرَ ته آهن!
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1086
داخلا جو حوالو:
هن داخلا جون تصويرون نه مليون
ڪوڙ کي پير نه سهي، پَرَ ته آهن!
تنطيم آهي ته اها، جيڪا ظلم جون سڀ حدون اورانگهڻ کانپوءِ به پاڻ کي مظلوم ثابت ڪري وڃي ٿي. گذريل 8 مهينن ۾ 1250 ماڻهن کي قبر دوز ڪري ڇڏيائين پر بيجنگ ۾ عورتن جي ڪانفرنس جي چيئرپرسن ڏانهن خط ويو آهي ته ڪراچيءَ ۾ مهاجر عورتن جو اغوا ۽ لڄ لٽڻ عام ٿي ويو آهي. دنيا ۾ شايد ئي ڪو فورم آهي، جنهن تان مظلوميت جو راڳ آلاپيو نٿو وڃي. شايد ئي ڪو نشرياتي ادارو آهي، جنهن کي قائل نه ڪيو ويو هجي ته ڪراچيءَ ۾ مهاجرن جي نسل ڪشي ٿي رهي آهي. 8 مهينن دوران قتل ٿيل 1340 ماڻهن مان ايم ڪيو ايم (الطاف) جا ڪارڪن فقط 94 آهن.باقي خدا جي خلق ايم ڪيو ايم جي گولين سان پروڻ ٿي ويا جن ۾ سنڌين جو تعداد ايم ڪيو ايم جي ڪارڪنن کان گهڻو آهي. سنڌين کي سڄي دنيا ۾ قاتل ۽ وحشي قوم طور پيش ڪيو پيو وڃي جيتوڻيڪ هر دهشتگرد پاڻ به ڄاڻي ٿو ته هن مهل تائين هڪ به سنڌيءَ موٽ ۾ هڪ به گولي نه هلائي آهي. ايم ڪيو ايم جي تنظيم جو بنياد گولي، ڪوڙ ۽ پريس تي اهي، جڏهن ته سنڌي ماڻهوءَ جي تنظيم امن جي ٻولي ۽ صبر جي طاقت تي ٻڌل آهي، ان هوندي به اهو نه وسارڻ گهرجي ته ڪوڙ ۽ سچ جي ڊوڙ ۾ ڪوڙ اڪثر اڳتي نڪري ويندو آهي، ڇاڪاڻ ته ڪوڙ کي پير نه سهي، پر ته هوندا آهن.
ايم ڪيو ايم حڪومت سان ڳالهين جي نئين دور تي راضي ته ٿي آهي پر ڪهڙيءَ طرح؟ عالمي سطح تي حڪومت خلاف پرچار جي مهم وڌائي ۽ سڄي سنڌ ۾ ڦيٿا روڪ هڙتال جو سڏ ڏيئي. ايم ڪيو ايم پنهنجي ڪم سان لڳل اهي. اهو آهي ڳالهين جي ٽيبل تي ويهڻ جو ڍنگ! اها آهي ”مهاجر“ قيادت جي حڪمت عملي. ايم ڪيو ايم قيادت ڪراچيءَ تي سندن قبضي جي دعويٰ ۽ مٿن ظلمن جو ڪوڙو ڪيس عالمي سطح تي ان کان به وڌيڪ اڀاري چڪي آهي، جيترو ڪشمير جو مسئل پاڪستان اٿاريو آهي. ثابت ٿئي ٿو ته حڪومت جي سڄي رياستي مشينري ۽ ملڪ جا مظلوم طبقا ظالم کي ظالم ثابت ڪرڻ ۾ ايڏو پوئتي رهجي ويا آهن جو اهي ايم ڪيو ايم جي پروپيگنڊا جي دز کي به پهچي نه سگهيا آهن. سنڌ ڪيس اڃا تائين عالمي شعور جي عدالت ۾ داخل ئي ڪو نه ٿيو آهي، جڏهن ته ايم ڪيو ايم جو ڍونگ ابتدائي ڪاميابيون ماڻي چڪو آهي، هيڏو عظيم ”واڪ اوور“ شايد ئي ڪنهن قوم ڏنو هجي!