ابڙو اڪيڊمي Abro Academy
2020-11-05
داخلا نمبر 1141
عنوان ڪو ڪيئن ڪري!؟
شاخ ڪشالو ڪيچ ڏي: ايڊيٽوريل-1روزاني برسات ڪراچي
پڙهيو ويو 1260
داخلا جو حوالو:
هن داخلا جون تصويرون نه مليون
ڪو ڪيئن ڪري!؟
27 ماڻهن جو قتل ڪيس خاص عدالت ۾ هلي پورو ٿيو ته سپاهه صاحبه جي 13 ڪارڪنن کي انهن خوني واقعن ۾ ملوث قرار ڏنو ويو. عدالت کين موت جي سزا ٻڌائي آهي. فيصلو عدالت جو آهي ۽ اڃا اهي مرحلا باقي آهن جو سزا ٻڌندڙ جوابدار اعليٰ عدالتن ۾ اپيل ۽ پوءِ ٽپيل به ڪري سگهن پر سپاهه صحابه فيصلو ڪيو آهي ته اها جمعي ڏينهن ان فيصلي جي خلاف احتجاج جو ڏينهن ملهائيندي. عدليه رياست جو آخري ٿنڀو آهي جنهن ۾ اڃا ڪجهه جان آهي پر لڳي ٿو ته پاڪستاني سياستدان جلد ئي ان اداري کي به ايئن ڊاهيندا جيئن هندن هندستان ۾ بابري مسجد ۽ مسلمانن ملتان وارو وشنو مندر ڊاهي پٽ ڪيو هو.
17 نمازي ڪراچي ۾ امام بارگاهن تي خوني حملن دوران قتل ٿيا هئا ۽ سڄي ڪراچيءَ۾ خوف جو راڪاس گهمي ويو هو. هڪ بي مذهبي تنظيم ان کي ”ديني بيداريءَ جي لهر“ سڏي ٿي. جيڪڏهن اها ئي بيداري جي لهر آهي ته پوءِ اها نفيس شاعري ڪيڏانهن ڪجي جنهن ۾ چيو ويو ته ”ڪوئي ڪيئن ڪري، جڏهن رڻ ۾ رات ٺري!“ هاڻي ته ايئن چوڻو پوندو ته ”ڪوئي ڪيئن ڪري، جڏهن جڳ ۾ باهه ٻري!“
مبصرن جو خيال آهي ته انهن سزائن تي عمل نه ٿيندو ۽ مذهبي جماعتن جو چوڻ آهي ته حڪومت سندن مقبوليت کان ڊڄي سزائون پئي ٻڌائي. عجب آهي ته اسان دهشتگردي ۽ خوف واري فضا کي ”مقبوليت ۾ اضافو“ ٿا سمجهون! هوڏانهن سزا ورتل جوابدارن کي اطمينان آهي ته جيڪڏهن کين ڦاهي ڏني وئي ته هو سڌا جنت ۾ ويندا. سندن پرسڪون چهرا اهو تجويز ڪري رهيا هئا ته هو پنهنجي موت جي سزا کي ”جنت جو انعام“ سمجهي رهيا هئا. الائي ته ڇو مسلمان ڀائرن جنت ڪمائڻ جا امن ڀريا رستا ڇڏي دوزخ مان واٽون ڳولهڻ جي ڪوشش ڪئي آهي!