ابڙو اڪيڊمي Abro Academy
2020-11-04
داخلا نمبر 885
عنوان گاجي شاهه جي ڏاچيءَ جي قبر
شاخ منڇر گورک گاج دنيا
پڙهيو ويو 1272
داخلا جو حوالو:
هن داخلا جون تصويرون نه مليون
گاجي شاهه جي ڏاچيءَ جي قبر
گاجي شاهه جي مزار کان ڏکڻ پاسي (احاطي کان ٻاهر) ان ڏاچيءَ جي قبر آهي، جنهن تي گاجي شاهه جي شهادت کان پوءِ سندس لاش کي هتي آندو ويو. عقيدمندن جو چوڻ آهي ته اها ڏاچي خدا جي حڪم سان هلندي هلندي هِتي اچي ويٺي، اتي گاجي شاهه کي دفن ڪيائون. گاجي شاهه کان پوءِ ڏاچيءَ کائڻ پيئڻ ڇڏي ڏنو، جلد ئي اها ڏاچي به مري وئي ته مزار جي ڏکڻ اولهه پاسي مسجد کي احاطي کان ٻاهرکليل جاءِ تي ان کي به دفن ڪيائون. ڏاچيءَ جي اها قبر تقريباً 15X10 فٽ ڊيگهه ويڪر جي آهي. قبر تي سادا پٿر ۽ پٿريون رکيل آهن. گاجي شاهه جو عام طور هر عقيدتمند اتي اچڻ بعد ان تي ڪا پٿري رکي ويندو آهي. ڪاڇي جا ماڻهو ان ريت قبرن جا نشان ڊهڻ کان بچائيندا آهن.
گاجي شاهه جا ڪي ڪي عقيدت مند هتي بسون به باسيندا آهن. ماڻهو باس يا مراد دل ۾ ٻَڌي، ساهه بند ڪري، ڏاچيءَ جي قبر جي چوڌاري ست ڦيرا ڏيندا آهن، انڪري اهي اڪثر تيز قدمن سان يا ڊوڙي ڊوڙي چڪر ڏيندا آهن. ان قبر تي ڪڏهن ڪڏهن ڪو پَڙ به نظر ايندو آهي، ڪو عقيدتمند وجهي ويندو هوندو!