گرينڊ الائنس جون تياريون

گرينڊ الائنس جون تياريون

الطاف حسين ”ٽيڪس ادا نه ڪرڻ“ واري مهم جو جيڪو خيال واپاري برادري ۽ پنهنجن حمايتين جي ذهنن ۾ داخل ڪيو هو، هاڻي عملي صورت اختيار ڪندو نظر پيو اچي. ان جي شروعات لاهورکان ٿي آهي، جيڪو حزب اختلاف جي ميان نواز شريف جو گهر آهي. واپارين پهرين مرحلي ۾ سول نافرمانيءَ جي تحريڪ هلائڻ جو اعلان ڪندي چيو ته آڪٽوبر کان بجليءَ جا بل ۽ 96-1995ع جي ٽيڪسن جا گوشوارا داخل نه ڪيا ويندا. واپاري، جيڪي ٽيڪس بچائڻ ۾ ڀڙ هوندا آهن، انڪم ٽيڪس آفيسرن جي ڪجهه اختيارن تي چڙيل آهن. هو انهن اختيارن کي عدالت ۾ چئلينج ڪرڻ بدران مارڪيٽن ۾ جسماني مزاحمت جي ذريعي للڪارڻ جي ڳالهه ڪري رهيا آهن. معاشي سطح تي سول نافرمانيءَ جي هيءَ صورت ٻين صوبن ۾ به منهن ڪڍي سگهي ٿي ڇاڪاڻ ته اها واٽ حزب اختلاف جا مقصد پورا ڪرڻ لاءِ کولي وئي آهي.
ان سان گڏ راولپنڊيءَ مان اطلاع پهتا آهن ته 16 سياسي پارٽيون هڪ گرينڊ الائينس ٺاهي، ننهن چوٽيءَ جو زور هڻي، پيپلز پارٽيءَ کي اقتدار مان ٻاهر ڪرڻ لاءِ جوڙ ٽوڙ ۾ مصروف آهن. اهي پارٽيون ايندڙ هفتي اسلام آباد ۾ اجلاس ڪري رهيون آهن. سندن اتحاد جو فقط هڪ نڪتو آهي، ”موجوده حڪومت کان نجات.“ ڪنهن جمهوري سيٽ اپ ۾ ترقي ۽ جمهوريت جي دعوا ڪندڙ ڌرين جو اهو هڪ نڪتو ڪيڏو نه عجيب آهي! حڪومت کان نجات لاءِ گرينڊ الائينس! هن هڪ نڪاتي ايجنڊي تي في الحال مسلم ليگ (ن)، عوامي نيشنل پارٽي، پاڪستان جمهوري پارٽي، تحريڪ استقلال، ايم ڪيو ايم، جماعت اسلامي، جميعت علماءِ پاڪستان جا ٻئي گروپ، پيپلز پارٽي (ش ڀ) گروپ، جوڻيجو ليگ (طارق چوڌري)، جمهوري وطن پارٽي ۽ بلوچستان نيشنل موومينٽ سان به رابطو ڪيو ويو آهي. اجمل خٽڪ جيڪو گرينڊ الائنس رابطا ڪميٽيءَ جو چيئرمين آهي چوي ٿو ته ”اسان مجبور ٿي ٽڪراءُ جي واٽ ورتي آهي.“
اجمل خٽڪ ”مجبور“ ٿيو آهي. هن اها مجبوري ان مهل محسوس ڪئي آهي، جڏهن افغانستان ۾ پاڪستان ايمبيسي تي حملي وارو واقعو سامهون آيو ۽ انهن وادين ۾ افغان هڪ ٻئي کي ڪهي رهيا آهن جن ۾ اجمل خٽڪ اڌ ڄمار گذاري ۽ جڏهن حڪومت پاڪستان افغان راهداريءَ جي غلط استعمال تي اکيون پٽيون آهن. اجمل خٽڪ کي سڀ کان وڌيڪ تڪليف شايد ”راهداريءَ“ تي هلندڙ سمگلنگ واري ڪاروبار کي روڪڻ تان ٿي آهي.
ايم ڪيو ايم، پيپلز پارٽيءَ سان ڳالهيون بند ڪري گرينڊ الائنس طرف رڙهي آهي، ٻيو ته ٺهيو مير مرتضيٰ ڀٽو، جيڪو بينظير ڀٽو تي فقط اها چڙ ڏيکاريندو آيو آهي ته هوءَ قاتلن سان ملي وئي آهي، پاڻ انهن سان گڏ بيهندو نظر ٿو اچي، جيڪي ضياءَ جي باقيات ۽ سنڌ دشمن نظر اچن ٿا. گرينڊ الائنس جون اڪثر پارٽيون ته محض ڪاغذي تنظيمون آهن پر ٻيون جيڪي به آهن، انهن اڄ تائين پاڻ کي سنڌ دوست ثابت نه ڪيو آهي.
اها آهي سياست! جنهن ۾ سياستدان رات وچ ۾ درياهه جي ٻئي ڪپ تي وڃيو گڏ ٿين. اصول اصول ته هر ڪو چوي ٿو پر ڪو ان تي بيهي نه سگهيو آهي.