ابڙو اڪيڊمي Abro Academy
2020-11-04
داخلا نمبر 888
عنوان گورانڊي
شاخ منڇر گورک گاج دنيا
پڙهيو ويو 1293
داخلا جو حوالو:
هن داخلا جون تصويرون نه مليون
گورانڊي
گورانڊي ماڳ، گاجي شاه کان لڳ ڀڳ 12-11 ڪلوميٽر ڏکڻ طرف آهي. هتي ٻه عدد دڙا آهن جيڪي آمري ۽ سنڌو تهذيب سان تعلق رکن ٿا. انهن مان پهريون دڙو ان حوالي سان اهم چئي سگهجي ٿو ته اهو اوچائي ۾ وڌيڪ يعني 15 فٽ آهي، ان تي اسلامي دور جون اڏاوتون آهن. هتي موجود دڙي کي ڏسڻ سان محسوس ٿئي ٿو ته هي قديم وقت ۾ ڪوٽ جي صورت ۾ اڏيل هو. روايتون به ائين آهن. اسلامي دور جي آثارن جي هيٺان تاريخ کان آڳاٽين ثقافتن جون پاڇيون به ڏسجن ٿيون، ان ئي دڙي تي پٿري جي هڪ بي ترتيب ننڍي دائري اندر وچ تي جانڊهه جا ٻئي پڙ محفوظ حالت ۾ پيا آهن.
”اها اٿئي جانڊهه!“ گهرام نوحاڻيءَ هڪدم چيو،“ گاجي شاهه ان تي پاڻ اَنُ پيهي پنجن تنن کي ڪائيءَ ۾ اٽو پهچائيندو هو!“
اهو بلڪل ممڪن آهي ته هن جنڊ جو تعلق ميان وال تحريڪ ۽ گاجي شاهه واري دور سان هجي. ۽ هتي به فقيرن جو مرڪز قائم هجي، جنهن جي کاڌ خوراڪ جون ضرورتون پوريون ڪرڻ لاءِ هتي مستقل بندوبست رکيل هجي. ان ريت اها جانڊهه تقريباً 300 سال پراڻي آهي. علائقي جا ماڻهو هن دڙي کي ’گاجي شاهه جو ٺلهه‘ به چوندا آهن.
”ٻيو دڙو هتان اڌ ميل يا ڪلوميٽر کن ڏکڻ اولهه ۾ آهي، اتي کوٽائيءَ مان ڳاڙهي تي ڪارو ٺڪر ملي ٿو، اتي پٿر جا بليڊ (اڇر) کرچڻا، مڻڪا، سپن، ڪوڏن جا کوپا، ڪنگڻ ۽ ٻيون شيون ملن ٿيون.“ بخاري صاحب چيو. گاجي شاهه کان نئنگ جو فاصلو 22 ڪلوميٽر ٿيندو. اسان گهرام نوحاڻي کي 45: 4 وڳي نئنگ ۾ لاهي ڪائيءَ جو رخ ڪيو.