ابڙو اڪيڊمي Abro Academy
2020-11-04
داخلا نمبر 980
عنوان گورک 2
شاخ منڇر گورک گاج دنيا
پڙهيو ويو 1268
داخلا جو حوالو:
هن داخلا جون تصويرون نه مليون
گورک 2
22 جنوري 2007
اڄ وري گورک جو پنڌ هو. آئون رات ئي عزيز رانجهاڻيءَ وٽ دادو پهچي ويو هئس. صبح جو نائين لڳي جوهيءَ مان ’شاد آباد‘ جي جيپ جوهيءَ مان کڻي واهي پانڌيءَ جي سرڪاري اسپتال ۾ ڊاڪٽر زبير پنهور وٽ پهچايو. اڄ پوليو جي ٽُڪن واري مهم جو ڏينهن هو. ڊاڪٽر پنهنجو آئس باڪس ويڪسين سان ڀريو، ’شاد آباد‘ جا والينٽيئر به اچي پهتا. هر ڪنهن کي خبر هئي ته گورک واري واٽ سان پري پري تائين جبل جي ڪهڙي ڪنڊ ۾ ڪنهن کي وڃڻو آهي ۽ اتي ٻار جمع ڪري انهن کي ڦُڙا پيارڻا آهن. ڊاڪٽر زبير کي سرڪاري فور وهيل مليل هئي، ”گورک تائين توهان پنهنجو ڪم ڪندا هلجو، اسان پنهنجو ڪم ڪندا وينداسين!“ ڊاڪٽر زبير چيو. سرڪار جو جهونو راڪيٽ ۽ ان جو پائليٽ جبل جي پنڌ جا هيراڪ ٿي لڳا.
11 لڳي روانگي ٿي. لوهيڙي جا ڳاڙها گل نئه جي پيٽ ۾ وڏي رونق لايو بيٺا هئا. مون ڀانيو اڳتي ڪنهن مناسب جاءِ تي يا مٿي گورک تي لوهيڙي جا گل ڪيميرا ۾ محفوظ ڪندس، پر اها منهنجي اڻڄاڻائي هئي. لوهيڙو فقط هيٺ نئه جي پيٽ ۾ ٿئي ٿو. لوهيڙي جا گل ٻن رنگن جا ٿين ٿا، ڪن وڻن ۾ ڳاڙها ته ڪن وڻن ۾ هيڊا!