2020-11-04
داخلا نمبر 924
عنوان گولو کوسو :
شاخ منڇر گورک گاج دنيا
پڙهيو ويو 1292
داخلا جو حوالو:
هن داخلا جون تصويرون نه مليون
گولو کوسو :
ڳوٺ علي مراد شاهاڻيءَ کان هڪ ڪلوميٽر ڏکڻ ۾ 200 کن فٽ اوچي ٽڪريءَ تي ’گولي فقير‘ جي قبر آهي. اهو ڏس مون کي عزيز ڪنگراڻيءَ ڏنو هو. گهڻو ممڪن آهي ته هي ميانوال تحريڪ وارو اهو ئي گولو کوسو آهي جيڪو ميان يار محمد ڪلهوڙي جي ڏينهن ۾ (سن 1700ع )پنهورن هٿان مارجي ويو هو، جنهن واقعي کي بنياد بنائي ميان يار محمد ڏنڊي جي زور تي پنهورن کان سامتاڻي جو علائقو ڇڏائي کين لڏائي ڇڏيو. ڳوٺ سامتاڻي هتان گهڻو پري نه آهي. سامتاڻين واري مشهور مسجد جوهيءَ کان ڀان سيد آباد واري رستي تي اڄ به بيٺل آهي. اهو ئي علائقو سمن جي حڪومتي دور ۾ دولهه دريا خان جي جاگير هو.
اسان ٽڪريءَ تي چڙهي وياسين. هيءَ بٺي هاڻي قبرستان بڻجي چڪي آهي، اسان لاءِ قبر ڳولڻ ڪجهه مشڪل ٿي پوي ها پر هڪ مقامي بوزدار اسان جي رهنمائي ڪئي. ٽڪريءَ جي اتر واري حصي ۾ بنهه چوٽ تي هڪ عَلم کتل هو. ان کان ٿورو هيٺ اولهه پاسي پٿرن جي سادي قبر گولي فقير جي آهي . ڪجهه وقت اڳ تائين علائقي جا ’شاهاڻي فقير‘ ان تي پڙ وجهندا هئا ۽ وقت به وقت راڳ جي محفل به ڪندا هئا. هاڻي اهو سلسلو ختم ٿي ويو آهي. هيءَ قبر گولي فقير جي آهي، اها روايت ته هر ماڻهوءَ وٽ موجود آهي، پر ڪنهن به شخص کي اها خبر نه هئي ته ته هن فقير جو ڪڙم قبيلو ڪهڙو هو؟ بس ايترو ٿي چيائون، ”فقير آهي، ماڻهو دعا لاءِ اچن ٿا ٻيو اسان کي ڪو خبر ڪونه، گهڻي وقتن جي ڳالهه آهي، اسان پر اسان جي ابي ڏاڏي اهو ايئن ئي ڏٺو!“
گولو کوسو پنهوارن هٿان ڇو قتل ٿيو؟ ان بابت هڪ روايت آهي، جنهن موجب گولو کوسو ميانوال تحريڪ جو جوشيلو فقير هو ۽ لوڙهيون هڻندو هو. هن پنهورن جو مال هنيو ۽ لوهي بلوچستان ڏانهن ڪاهي پئي ويو ته کيس علي مراد شاهاڻيءَ وٽ سج لهي ويو، پنهور پيرو کڻي اتي پهتا ۽ کيس ماري وڌائون.